Փաստ ինֆո

Ազգային ժողովի «Ելք» խմբակցության պատգամավոր Արամ Սարգսյանը տեղյակ չէ, թե հատկապես ում նկատի ուներ վարչապետ Նիկոլ Փաշինյանը, երբ հայտարարեց, որ որոշ ուժեր խորհրդարանում, «քուչեքում» ու ռեստորաններում բանակցում են ՀՀԿ-ի հետ, հակահեղափոխություն են անում։

ԱԺ-ում այսօր լրագրողները հետաքրքրվեցին, թե հնարավո՞ր է հենց իրեն նկատի ունի Փաշինյանը՝ Ա, Սարգսյանն ասաց, որ ինքը շատ ընկերներ ունի և ՀՀԿ-ից, և ԲՀԿ-ից, տարբեր ուժերից, նրանց հետ հաճախ հանդիպում է, բայց ռեստորան գնալ չի սիրում, ոչ թե այն բանի համար, որ ռեստորանի ուտելիքը չի սիրում, այլ պարզապես գյուղում ռեստորան չկա:
Նրա խոսքով, աշխատանքից հետո ինքը գնում է գյուղ, հանում է կոստյումն ու փողկապը և հանգստանում։

«Իրեն հարցրեք, ինքը կասի՝ ում նկատի ունի: Ես որևէ բան չեմ բացառում: Եթե երկրի վարչապետն ինչ-որ բան ասում է, ուրեմն ինչ-որ բան գիտի: Կասի ինձ, ես կպատասխանեմ, կասի ուրիշին, ուրիշը կպատասխանի: Խնդիրը բացարձակ այդ հարթության մեջ չեմ նայում, ես նայում եմ, որ երկրի առաջ ծառացած խնդիրները պետք է լուծել քաղաքական դաշտում համախմբվածության, փոխադարձ հարգանքի մթնոլորտում», - հավելեց Արամ Սարգսյանը:

Պատգամավորի խոսքով, ինքը հայ մարդուն չի բաժանում հեղափոխականի և հակահեղափոխականի, բաժանում է գաղափարակցի և ոչ գաղափարակցի:

«Քննարկել կարելի է ամեն ինչ, ում հետ ցանկանաս: Ես երկրորդ կուրսում սովորող իմ աղջկա հետ էլ եմ քաղաքական հարցեր քննարկում։ Դժոխքի բաժին դառնալուն հավասար չէ քննարկումը», - հավելեց Արամ Սարգսյանը։

Հիշեցնենք՝ Փաշինյանը երեկ Էրեբունի վարչական շրջանում քարոզարշավի ժամանակ ասել էր. «Երևանի քաղաքապետի ընտրությունների համատեքստում կան քաղաքական ուժեր, որոնք նաև իրենց ներկայացնում են հեղափոխության պաշտպան, հեղափոխության առաջամարտիկ ու էսօր գիտե՞ք ինչ ա տեղի ունենում, էսօր նրանք գնացել են խորհրդարանում են բանակցում ՀՀԿ-ականների հետ, քուչեքում են բանակցում ՀՀԿ-ականների հետ, տարբեր ռեստորաններում են բանակցում ՀՀԿ-ականների հետ, թե բա՝ տղերք կլինի դուք էս ընտրություններում ձեր ընտրակեղծարարության ռեսուրսով մեզ պաշտպանեք, մենք էլ, որ հաղթենք քաղաքապետի ընտրություններում, ընենց կանենք, որ խորհրդարանական արտահերթ ընտրություններ տեղի չունենան, խորհրդարանը չլուծարվի,որ դուք մի քանի տարի էլ պատգամավորական մանդատ ունենաք։ Չի ստացվի, ձեր ջախջախիչ պարտություն է սպասվում, որովհետեւ ժողովուրդն է ձեզ մատնելու պարտության։ Սթափվեք, գժուկներ, սթափվեք»։

Աղբյուր` Փաստինֆո