Փաստ ինֆո

ՀՀ նախկին նախագահ Սերժ Սարգսյանի եղբոր որդու՝ Հայկ Սարգսյանի խափանման միջոց կալանքը 50 մլն դրամ գրավով փոխարինելու մասին որոշումը նրա փաստաբան Երեմ Սարգսյանը արդարացի է համարում։

Լրագրողների հետ ճեպազրույցում փաստաբան Երեմ Սարգսյանը հայտարարել է. «Այս գործով ընդհանրապես կալանք չպետք է կիրառվեր, բայց հաշվի առնելով այս քրգործը, դրա նկատմամբ հասարակական հետաքրքրությունը և որոշակի այլ պրոցեսներ՝ գտնում եմ, որ դատարանն այստեղ գոնե վերականգնեց արդարությունը»։

Հիշեցնենք, որ նախորդ դատական նիստում նրա պաշտպանը միջնորդություն էր ներկայացրել դատարան՝ խափանման միջոց կալանքը փոխելու մասին։ Այսօր հրապարակվեց դատարանի որոշումը՝ խափանման միջոց կալանքը փոխելու և Հայկ Սարգսյանին 50 մլն դրամ գրավի դիմաց ազատելու մասին։

Երեմ Սարգսյանը հավելեց, որ Հայկ Սարգսյանի ընկերները մինչև դատական նիստն իրեն ասել էին, որ պատրաստ են դատարանի կողմից սահմանվող գրավի չափը վճարել։

«Այս պահի դրությամբ հաշվի առնելով գործի հնչեղությունը՝ կարծում եմ՝ այս գրավի չափը, հաշվի առնելով առկա պրակտիկան, բավականին բարձր շեմ է։ Սովորաբար մինչև 5 մլն դրամ է սահմանվում», - ասել է փաստաբանը։

Հայկ Սարգսյանը կարող է ազատ արձակվել գումարը վճարելուց և անդորրագիրը դատարանին ներկայացնելուց հետո։

Ըստ փաստաբանի՝ իր պաշտպանյալին կալանավորելու հիմք չկար, իսկ գրավի կիրառումը անձին հնարավորություն է տալիս ազատության մեջ լինել ու նաև ներկայանալ դատական նիստերին։

Լուսանկարը՝ Aysor.am-ի

Աղբյուր` Փաստինֆո