Փաստ ինֆո

Ոստիկանությունը հետախուզում է հայտարարել 3 տղամարդու նկատմամբ, ովքեր սեպտեմբերի 5-ին կրակահերթ են արձակել Audi A8 ավտոմեքենայի ուղղությամբ։

66.RU-ն հղում կատարելով իր աղբյուրներին՝ նշում է, որ իրավապահների կարծիքով հարձակմանն առնչություն են ունեցել 1990-ականներին հայտնի «հեղինակություններ» Հասայան եղբայրների միջավայրի մարդիկ։

Մասնավորապես՝ «գրոհայինների» շարքերում եղել են եզդիներ՝ Հայաստանից, որոնց անվանում են հայկական եզդիներ։ Միաժամանակ՝ Սվերդլովի շրջանի եզդիների համայնքի ներկայացուցիչը հերքել է այդ կասկածները։

Եկատերինբուրգում Հասայան ընտանիքը, որը Մոսկվայում սպանված «օրենքով գող» Ասլան Ուսոյանի (Դեդ Հասան) գերդաստանի մի ճյուղն է, պայքարել է «Ուրալմաշի» խմբավորման հետ։ Միաժամանակ 90-ականների սկզբներին՝ Հասայան եղբայրները սերտ համագործակցել են «կենտրոնականների» հետ։ Նրանք զբաղվել են ավազակային հարձակմամբ և հափշտակություններով ամբողջ Ռուսաստանի տարածքում։Տեղական հանցավոր կլանի հետքի վրա դուրս գալուց հետո իրավահները դաշնային հետախուզում են հայտարարել Հասայանների 18 հարազատների նկատմամբ։

Ավելի ուշ հակասություններ են առաջացել նաեւ ընտանիքի ներսում և ազդեցության համար պայքարել միմյանց դեմ։ 2001 թվականին Եկատերինբուրգում գնդակահարվել է Նորիկ Հասայանը, ինչից հետո համարվում էր, թե ընտանիքի ներկայացուցիչները հեռացել են կրիմինալից և օրինական բիզնեսով են զբաղվում։

Հիշեցնենք,որ Audi A8 -ի վրա հարձակումը տեղի է ունեցել սեպտեմբերի 5-ի երեկոյան։ ВАЗ-2112 ավտոմեքենայի ուղեւորները Կալաշինկով ինքնաձիգից կրակահերթ են արձակել Audi-ի ուղղությամբ, որի վարորդն ու ուղեւորը պաշտպանվել են տրավմատիկ զենքի կիրառմամբ։ Արդյունքում տուժել է միայն վարորդը, ում տեղում ցուցաբերել են անհրաժեշտ օգնություն։ ВАЗ-2112 դեպքի վայրից հեռացել է, որն ավելի ուշ հայտնաբերվել է, սակայն առանց ուղևորների։

Ռուսական լրատվամիջոցների փոխանցմամբ՝ Audi ուղեւորը տեղափոխելիս է եղել առանձնապես խոշոր չափերի գումար, որի ծագումն անօրինական է։

Աղբյուր` Փաստինֆո