Փաստ ինֆո

«Ժամանակ»-ը գրում է, որ Նիկոլ Փաշինյանի՝ այսօր Մոսկվա կատարելիք այցին ընդառաջ հայ- ռուսական հարաբերությունների և սպասվող քննարկումների առնչու­թյամբ ամենաբազմազան դիտար­կումներին և գնահատականներին թերևս արժե ավելացնել մեկը, որը շոշափելիորեն դուրս է մնացել հիմ­նական պրիզմայից:

«Որպես Փաշինյան-Պուտին երրորդ հանդիպման քննարկումների և ընդհանրապես նոր իրավիճակում հայ-ռուսական հարաբերության որոշակի վերաֆորմատավորման գործընթացի առանցքային թեմաների և օրակարգերի առարկա դիտարկվում են երկկողմ հարցեր, եվրասիական ինտեգրացիոն նախագծերին, ԵՏՄ-ին, ՀԱՊԿ-ին առնչվող հարցադրումներ, իսկ ներ­քին համատեքստում էլ դիտարկվում են Ռոբերտ Քոչարյանին, «Մարտի 1-­ին» վերաբերող խնդիրներ:

Իրականում, սակայն, արժե թերևս ու­շադրություն դարձնել ներքին համա­տեքստում առկա մի կարևոր հեռան­կարի, որը, մեծ հավանականությամբ, կարող է լինել Հայաստանի նոր իշխա­նության և Ռուսաստանի քննարկումնե­րի առարկա, առաջացնել Հայաստանի հանդեպ Ռուսաստանի հետաքրքրու­թյան որոշակի դրսևորումներ:

Խոսքը Հայաստանում խորհրդարանի արտա­հերթ ընտրության և ըստ այդմ՝ հնգա­մյակի հեռանկարում նոր ներքաղաքա­կան ստատուս քվոյի ձևավորման մա­սին է, որտեղ արդեն զուտ Ռոբերտ Քոչարյանի ճակատագիրը զգալիորեն նվազում և դառնում է ընդամենը մի դրվագ, գլոբալ խնդրի մի «աքսեսուար»: 

Հայաստանում տեղի է ունեցել թավշյա հեղափոխություն և գործադիր իշխանափոխություն, սակայն խորհրդարա­նական կառավարման մոդելի պարագայում բաց է հենց խորհրդարանական մեծամասնության հարցը, և միայն այդ հարցի լուծումն արդեն կտա ամբողջա­կան պատկեր, և հնարավոր կլինի խոսել նոր ստատուս քվոյի մասին: Իսկ այս­տեղ արդեն խնդիրը միայն մեծամաս­նությունը չէ, քանի որ շատ կարևոր է, թե ինչպիսին է լինելու նաև խորհրդարանի փոքրամասնությունը: Ովքե՞ր են ներկա­յացված լինելու խորհրդարանում՝ Նիկոլ Փաշինյանի քաղաքական միավորից բացի: Դեռ ինքնին հարց է, թե ինչպիսին է լինելու այդ միավորը, ինչ ուժերից է կազմված լինելու՝ դաշի՞նք է լինելու, ի՞նչ բաղադրությամբ, ի՞նչ առանցքով, թե՞ գնալու է ընտրության ՔՊ-ն:

Դրանից բացի, հարց է, թե բացի այդ ուժից, ովքեր են ներկայացված լինելու խորհրդարանում որպես, այսպես ասած, փոքրամասնություն՝ նկատի ու­նենալով հատկապես այն, որ ըստ Սահ­մանադրության և օրենքի՝ խորհրդա­րանի, այսպես ասած, մեկ երրորդը կամ երեսուն տոկոսը պետք է լինի ընդդիմու­թյուն: Իսկ Ռուսաստանին, որը խիստ զգայուն է Հայաստանի ներքին ստա­տուս քվոյի հարցում և կշարունակի մնալ այդ վիճակում դեռևս տարիներ, անշուշտ հետաքրքրում է ոչ միայն հարցը, թե ով է լինելու իշխող մեծամասնություն­»,-գրում է թերթը:

Հոդվածն ամբողջությամբ կարող եք կարդալ «Ժամանակ»-ի՝ 08.09.18թ. համարում:

Աղբյուր` Փաստինֆո