Փաստ ինֆո

Ժամանակն է ընդունել նոր ազգային անվտանգության ռազմավարության հայեցակարգ ու ռազմական դոկտրին։  Ֆեյսբուքում նման կարծիք է հայտնել փաստաբան Նորայր Նորիկյանը։

Նրա գրառման մեջ, մասնավորապես, ասվում է.

«Մեր պետությունը փոխվել է արմատապես ու որակապես, ձևով ու բովանդակությամբ: 

Փոխվել է նաև մեր ժողովրդի մտածողությունը և իր վաղվա օրը կառուցելու տրամադրվածությունը:

Հասարակության մոտ վերականգնվել է հավատը սեփական ուժերի հանդեպ, և ամենակարևորը՝ մարդիկ սկսել են հավատալ, որ իրենց վարքագծից ու որոշումներից է կախված երկրի ապագան: 

Բացի այդ, Հայաստանն այժմ այլ ընկալում ունի միջազգային հանրության դիտանկյունից:

Փոխվել են նաև Հայաստանի պատկերացումներն ու դիրքորոշումները ինչպես ներքին, այնպես էլ արտաքին խնդիրների լուծման գործընթացում:

Այս ամենի հետ զուգահեռ, այլ ընկալում են ձեռք բերել Հայաստանի առջև ծառացած թե՛ ներքին, թե՛ արտաքին մարտահրավերները:

Հայաստանի նոր իշխանությունները որակապես նոր սանդղակի վրա են բարձրացրել իրավական պետության կառուցման, օրինականության վերականգնման, ոչ ֆորմալ ինստիտուտների վերացման, օրենքի առաջ բոլորի հավասարության, պատասխանատվության անխուսափելիության սկզբունքների կիրառման հարցերը, ինչը խոսում է որակապես նոր իրողությունների և հարցերի լուծման գործիքակազմի մասին:

Ինչ-որ առումով փոխվել է նաև տարածաշրջանային հակամարտությունների լուծման վերաբերյալ ունեցած պատկերացումները:

Նոր իրողությունների խորապատկերում Հայաստանը կանգնած է արմատական փոփոխությունների առաջ, և այս առումով Հայաստանի նոր իշխանությունների առջև ծառացած են լրջագույն խնդիրներ, որոնք հրատապ լուծման անհրաժեշտություն են զգում…

Իմ կարծիքով, խոսքը գնում է երկու կարևորագույն փաստաթղթերի՝ նոր «Ազգային անվտանգության ռազմավարության» հայեցակարգի և «Ռազմական դոկտրինի» ընդունման մասին:

Նշված փաստաթղթերն ընդունվել են 2007թվականին: 

Անցած տասնմեկ տարիների ընթացքում Հայաստանում շատ բան է փոխվել, և Հայաստանն ինքն է փոխվել:

Որպեսզի պարզ լինի, թե ինչի մասին է խոսքը, հնարավորինս սեղմ շարադրենք այն գլոբալ փոփոխությունները, որոնք կատարվել են վերջին տասնմեկ տարիների ընթացքում:

Այսպես.

1. Փոխվել է մեր երկրի դեմոգրաֆիական պատկերը, և էապես կրճատվել բնակչության թվաքանակը,
2. Հայաստանը դարձել է ԵԱՏՄ անդամ պետություն,
3. Հայաստանը ստորագրել է Եվրամիության հետ համապարփակ եւ ընդլայնված գործընկերության մասին համաձայնագիրը,
4. Արմատապես փոփոխության է ենթարկվել երկրի սահմանադրությունը, և Հայաստանը կիսանախագահական կառավարման համակարգից անցում է կատարել խորհրդարանական կառավարման համակարգի,
5. 2016թ. ապրիլյան պատերազմի արդյունքում արմատապես փոխվել է Արցախի հակամարտության լուծման փիլիսոփայությունը, ինչպես նաև Հայաստանի և Արցախի անվտանգության ապահովման վերաբերյալ ունեցած պատկերացումները:
6. 2018թ. ապրիլ ամսին Հայաստանում ժողովրդական համընդհանուր ընդվզման արդյունքում իշխանությունը վերադարձվել է ժողովրդին, և ժողովուրդը պատրաստ է պաշտպանել ու պահպանել իր իշխանությունը՝ աչքի առաջ ունենալով մի շարք լրջագույն մարտահրավերներ:

Վերը նշված սեղմ հանգամանքների լույսի ներքո գտնում եմ, որ անհրաժեշտություն է առաջացել հնարավորինս արագ ընդունելու նոր «Ազգային անվտանգության ռազմավարության» հայեցակարգ, ինչպես նաև նոր «Ռազմական դոկտրին», որոնք համահունչ կլինեն ստեղծված նոր իրողություններին ու մարտահրավերներին և կդառնան այն կենսունակ գործիքները, որոնք հնարավորություն կտան լուծելու նշված խնդիրները:

Կարծում եմ, որ նոր իշխանությունները այս ուղղությամբ պետք է սկսեն կոնկրետ ու գործնական քայլեր իրականացնել…»

Աղբյուր` Փաստինֆո