Փաստ ինֆո

Արագածոտնի նախկին մարզպետ Սարգիս Սահակյանի անունը շոշափող կոռուպցիոն բնույթի հերթական աղմկոտ քրեական գործը կքննվի Հատուկ քննչական ծառայության վարույթում։

Նախօրեին ոստիկանությունը հաղորդագրություն էր տարածել առ այն, որ կազմակերպված հանցավորության դեմ պայքարի գլխավոր վարչությունը բացահայտել է կոռուպցիոն բնույթի հանցագործություն՝ Արագածոտնի նախկին մարզպետի մասնակցությամբ։ 

Մասնավորապես՝ պարզվել է, որ 2015թ․ սեպտեմբերի 19-ին Արագածոտնի մարզպետարանի և «Գրէդշին» ՍՊ ընկերության միջև կնքվել է 29․100․000 դրամի շինարարական աշխատանքներ կատարելու վերաբերյալ պայմանագիր։ 4 օր հետո, մարզպետի կարգադրությամբ ձևավորվել է շինարարական օբյեկտների աշխատանքին հետևող հանձնաժողով։

Նախնական տվյալներով՝ որոշ ժամանակ անց «Գրէդշին» ընկերության տնօրինությունը իրականությանը չհամապատասխանող հավելագրումներ կատարելով՝ պատրաստել է շինարարական աշխատանքները ավարտելու վերաբերյալ կեղծ ավարտական ակտ։ Մարզպետը, պաշտոնեական դիրքը ծառայության շահերին հակառակ օգտագործելով և անձնական այլ շահագրգռվածությունից ելնելով, հորդորել է հանձնաժողովի նախագահին ու անդամներին՝ հաստատել ավարտական ակտը։ Ապա, 2016 թ․ հունվարի 21-ին մարզպետն ինքն է ստորագրությամբ հաստատել հանձնաժողովի նախագահի և որոշ անդամների չստորագրած, որոշ անդամների կեղծ ստորագրությամբ կամ համայնքի ղեկավարի պարտադրանքով ստորագրված ավարտական ակտը։ Արդյունքում՝ «Գրէդշին» ընկերությունը յուրացրել է 10․660․000 դրամ։

Առանձնապես խոշոր չափի գումար յուրացնելու, պաշտոնեական կեղծիք կատարելու և էական վնաս առաջացրած պաշտոնեական լիազորությունները չարաշահելու դեպքերի առթիվ հարուցվել է քրեական գործ։

«Փաստինֆո»-ի տեղեկություններով՝ ոստիկանությունը քրեական գործն արդեն  ուղարկել է հատուկ քննչական ծառայություն, որտեղ էլ կքննվի այն։

Աղբյուր` Փաստինֆո