Փաստ ինֆո

Վարչապետ Նիկոլ Փաշինյանն այսօր հայտարարել է, որ աշխատանքներ են տարվում Սահմանադրության փոփոխության ուղղությամբ, որի արդյունքում Ազգային ժողովը կարող է լուծարվել առանց վարչապետի հրաժարականի։

«Ըստ գործող Սահմանադրության՝ վարչապետը պետք է հրաժարական տա, և երկու անգամ երկու շաբաթվա ընթացքում խորհրդարանը չընտրի նոր վարչապետ, որից հետո իրավունքի ուժով ԱԺ-ն պետք է արձակվի։ Եվ, ըստ էության, կառավարության ծրագրով, որն ընդունվել է խորհրդարանի կողմից, այս քաղաքական պայմանավորվածությունը հստակ արձանագրվել է խորհրդարանի, կառավարության և ժողովրդի կողմից: Սակայն հետևելով Հայաստանի քաղաքացիների տրամադրություններին՝ նրանք ուզում են, որ լինի որոշակի երաշխիքներ, որ իրենք վարչապետի ենթադրվող հրաժարականից հետո նորից ստիպված չեն լինելու հեղափոխություն անել: Բնականաբար, ես կարծում եմ, որ անհրաժեշտության դեպքում Հայաստանի քաղաքացիները կանեն այդ հեղափոխությունը, բայց, նաև մարդկանց այս ուղերձը ընկալելով, կարծում եմ, որ մենք պետք է ունենանք երաշխիքներ, որ հակաժողովրդական գործընթացներ ձեռնարկելու փորձեր չեն արվելու»,- «Փաստինֆո»-ի փոխանցմամբ՝ նշեց Փաշինյանը:

Նրա խոսքով, պետք է իրականացվեն սահմանադրական փոփոխություններ, որտեղ խորհրդարանի արձակումը կարող է տեղի ունենալ առանց վարչապետի հրաժարականի, այսինքն՝ խորհրդարանը ինքը պետք է ընդունի ինքնալուծարման որոշում։

Նա հավելեց, որ դրա համար կա երկու տարբերակ. «Առաջին տարբերակն այն է, որի մասին ես խոսել եմ: Պետք է իրականացվեն սահմանադրական փոփոխություններ, որտեղ խորհրդարանի արձակումը կարող է տեղի ունենալ նաև առանց վարչապետի հրաժարականի: Այսինքն, խորհրդարանը ինքն ընդունի ինքնալուծարման մասին որոշում, իհարկե, եթե, այսպես ասած, կայուն մեծամասնություն գոյություն չունի կամ այլ պայմաններում: Սա տարբերակներից մեկն է և ամենաերաշխավորված տարբերակներից մեկն է: Կարող է լինել նաև այլ տարբերակ, որ խորհրդարանական ուժերը ուղղակի այդ մասին ստորագրեն համաձայնագիր, բայց քանի որ մենք գիտենք, որ այդ համաձայնագրերը կարող են բավարար չթվալ մեր հանրությանը, հիմա աշխատում ենք սահմանադրական փոփոխությունների վրա: Փաթեթը շուտով պատրաստ կլինի, և մենք այն կուղարկենք խորհրդարան: Այս համատեքստում կունենանք քաղաքական քննարկումներ, ինչպես նաև ժողովրդի հետ քննարկումների արդյունքում կգանք ընդհանուր որոշումների»,- նշեց վարչապետը:

Նրա խոսքերով՝  ամենաուշը մյուս տարվա մայիսին կամ հունիսի առաջին տասնօրյակում պետք է տեղի ունենան արտահերթ խորհրդարանական ընտրություններ։

Աղբյուր` Փաստինֆո