Փաստ ինֆո

ՀՀ ոստիկանապետ Վալերի Օսիպյանն այսօր Հյուսիսային պողոտայում ներկա էր «Համերաշխություն փողոցային երաժիշտներին» ակցիային, որը կազմակերպվել էր ի աջակցություն երեկ երեկոյան բերման ենթարկված ուկրաինացի երաժշտի և հայտարարել, որ ոստիկանները գործել են իրենց լիազորությունների շրջանակներում։

Վ.Օսիպյանը հորդորեց ենթարկվել ոստիկանների օրինական պահանջներին և հույս հայտնեց, որ միջադեպի հետևանքով ուկրաինացու կարծիքը ոստիկանության և Հայաստանի հանդեպ չի փոխվել։

Լրագրողների հետ զրույցում ոստիկանապետն ասաց, թե բնակիչների կողմից ստացել են բազմաթիվ ահազանգեր այն մասին, որ նշված պողոտայում նվագող երաժիշտներն աղմկում են՝ խանգարելով մարդկանց հանգիստը: Ավելին, ըստ ոստիկանապետի՝ երաժիշտները գտնվել են ոչ սթափ վիճակում,  հայհոյանքներ հնչեցրել, ուստի ոստիկաններն ստիպված են եղել միջամտել։

Հիշեցնենք, որ համացանցում տարածվել են տեսանյութեր, որոնցում երևում է, թե ինչպես են ոստիկաններն ուժ կիրառելով փորձում երաժիշտներից մեկին հեռացնել պողոտայինց, որոնք մեծ աղմուկ են բարձրացրել: «Ազատության» լրագրողի այն դիտարկմանը, որ սոցիալական ցանցերում կարծիքներ են հնչում, թե ոստիկանները հին ավանդույթներին են վերադարձել, Օսիպյանը հայտարարեց. «Ոստիկանությունը գործում է «Ոստիկանության մասին օրենքով» և այդ պահին էլ է գործել այդ օրենքով։ Ըստ դրա, նախատեսված է նաև ֆիզիկական ուժ գործադրելը: Չի կարող ոստիկանը բոլորի հանդեպ լինել այնպիսին, ինչպես որ բոլորն են ուզում»։

Տեսանյութերում երևում է, որ ոստիկաններն ուժ են կիրառում, այսպես կոչված, «իռոկեզ» սանրվածքով մի փողոցային երաժշտի նկատմամբ, ով ազգությամբ ուկրաինացի է։ Վերջինս իրեն ուղղված հարցին պատասխանում է․ «Ես ոչինչ չեմ արել, հարցրեք նրանց, թե ինչ եմ արել։ Ես հարգում եմ ուրիշների օրենքները»։

Գրող, կինոդրամատուրգ Վահրամ Մարտիրոսյանը, որը հաճախ է լինում Հյուսիսային պողոտայում, ասում է, որ երաժիշտներն անգամ «ցածր էին նվագում»։ «Մեր պարոն ոստիկանները մոռացել են, որ իրենք նույնքան ատելություն էին հարուցում իրենց հանդեպ, ինչքան Սերժ Սարգսյանը, Ռոբերտ Քոչարյանը, որոնց հրահանգներով ծեծում էին ցուցարարներին, լրագրողներին: Հիմա մեր կողմից էդ ժեստը կա, որ դուք մեր ոստիկաններն եք, բայց իրենք չեն կարողանում դառնալ մեր ոստիկանները։ Նրանք ներկայացնում են իշխանությունը, գալիս են մարդկանց նեղում են, մարդկանց քշում են, նվաստացնում են: Էդ մարդիկ էլ խոցելի են․ նախ արվեստագետ են, հետո՝ որ եկել են այստեղ մի քանի դրամ վաստակելու, ուրեմն նաև կարիքավոր են: Ու միանգամից դրանց վրա՞ ուժները կպատի»,- ասում է Մարտիրոսյանը։

Արձագանքելով ոստիկանապետի հայտարարությանը, թե ամեն ինչ եղել է օրենքի սահմաններում, նա նշում է․ «Ասենք թե մարդը ոչ սթափ է, ընդ որում՝ ոչ մի հայհոյանք չի եղել, ես հարցրել եմ, հետաքրքրվել եմ: Էդ չի նշանակում, որ ձեռքերը պիտի ջարդես, գլուխը ասվալտին կպցնես»:

Աղբյուր` Փաստինֆո