Փաստ ինֆո

Փաստ է, որ հանքարդյունաբերությունը Հայաստանի տնտեսական աճի լոկոմոտիվն է ու սա անընդունելի է մեր կառավարության համար: Այսօր գործադիրի նիստում հայտարարել է ՀՀ Ավարչապետ Նիկոլ Փաշինյանը:

«Այսօր հանքարդյունաբերությունը մեր տնտեսական աճի հիմնական լոկոմոտիվն է, և մեր կառավարությունը բազմիցս արձանագրել է, որ տնտեսական աճի այդ մոդելը որևէ կերպ չի կարող ընդունելի համարվել։ Մեր կառավարության կարևոր խնդիրներից է փոխել տնտեսական աճի մոդելը ոչ միայն այն պատճառով, որ ուղղակի խոսքը տվյալ դեպքում վերաբերում է մեր ընդերքի վաճառքին, այլև՝ այդ ընդերքի վաճառքից գեներացվող գումարների արդյունքում ձևավորված գումարների աճը ներառող չէ, այսինքն՝ այդ տնտեսական աճի ազդեցությունը իրենց վրա չեն զգում Հայաստանի հանրապետության քաղաքացիները»,- ասել է Նիկոլ Փաշինյանը:

Նրա խոսքերով՝ պետք է ձեռնարկվեն բոլոր միջոցները՝ հանքարդյունաբերության ոլորտի նկատմամբ ավելի մեծ վերահսկողություն սահմանելու համար, հանքարդյունաբերությունն ավելի որակյալ և պատասխանատու դարձնելու համար:

Մասնավորապես պետք է սահմանվեն այնպիսի շահագործման կանոններ, որ հանրությունը իսկապես զգա, որ ազգային այդ հարստությունն օգտագործվում է այնպես, որ դրանից պետությունը և հանրությունը ստանում են այնքան օգուտներ, ինչքան պետք է իրականում ստանան։

Կառավարության այսօրվա նիստում ընդունվեց Հանքարդյունավերության ոլորտի զարգացման հայեցակարգի կատարումն ապահովող միջոցառումների ցանկը հաստատելու մասին որոշումը:

Աղբյուր` Փաստինֆո