Փաստ ինֆո

Հատուկ քննչական ծառայության պետ Սասուն Խաչատրյանը հույս ունի, որ Գլխավոր դատախազությունը կբողոքարկի վերաքննիչ դատարանի որոշումը՝ Ռոբերտ Քոչարյանին ազատ արձակելու վերաբերյալ, և վերջինս կհայտնվի անազատության մեջ, որպեսզի չկարողանա խոչընդոտել գործի քննությանը: Այդ մասին կառավարության նիստից հետո լրագրողների հետ ճեպազրույցում ասաց Սասուն Խաչատրյանը:

Հարցին, թե Քոչարյանը կարո՞ղ է լքել երկիրը, ՀՔԾ պետը պատասխանեց, որ ներկայումս Քոչարյանի նկատմամբ խափանման միջոց ընտրված չէ, սակայն չեմ կարծում, թե նա կլքի երկիրը, բայց եթե Ռոբերտ Քոչարյանը փորձ անի լքել երկիրը, դա կգնահատվի որպես նախաքննությունը խոչընդոտելու փորձ, վարույթն իրականացնող մարմնից թաքնվելու փորձ և կկիրառվի խափանման միջոց։

ՀՔԾ- պետն այսօր կրկնեց իր դիրքորոշումը՝ Ռոբերտ Քոչարյանի խափանման միջոց՝ կալանավորումը վերացնելու՝ վերաքննիչ որոշման ապօրինության վերաբերյալ, միևնույն ժամանակ նաև նշեց, որ դատավոր Ազարյանը բողոքի քննության ժամանակ բարձրաձայնել է, որ աշխատել է 2-րդ նախագահի աշխատակազմում և որ բողոքը քննելու առումով որևէ կաշկանդվածություն չունի:

«Այդ փաստը ես էլ չէի գնահատի նրա անկողմնակալության մասին, սակայն Ազարյանը պետք է ինքնաբացարկ հայտներ, քանի որ «Մարտի 1»-ին գործով կայացրել է 9 մեղադրական դատավճիռներ»,- հայտարարեց ՀՔԾ պետը:

Նշենք, որ բողոքի քննության ժամանակ կողմերը՝ այդ թվում նաև դատախազները նախագահողին ինքնաբացարկ չեն հայտնել և միայն իրենց համար ոչ ցանկալի որոշում կայացնելուց հետո՝ այս հարցը դրվեց շրջանառության մեջ:

Լրագրողի հարցին, իսկ դատախազները տեղյա՞կ չէին, որ Ազարյանը «Մարտի 1-ի» գործով դատավճիռներ է կայացրել՝ ՀՔԾ պետը պատասխանեց. «Կարող էին նաև տեղյակ չլինել»:

ՀՔԾ-ի պետի այս հայտարարությունը պարզապես հաստատումն էր նրա, որ «Մարտի 1-ի» գործը քննող ՀՔԾ քննիչները ինչպես նաև Ռոբերտ Քոչարյանին կալանավորելու վերաբերյալ առաջին ատյանի դատարանի որոշման դեմ բողոքի քննությանը ներկայացրած 2 դատախազները գործի ծավալի մասին ամբողջական տեղեկություն չունեն կամ ունեն, սակայն նախաքննական մարմնի և դրա ղեկավարումն իրականացնող դատախազների միջև մեղմ ասած տարաձայնություններ կան:

Հիշեցնենք, որ վերաքննիչ դատարանը՝ նախագահությամբ Ալեքսանդր Ազարյանի, վերացրել է Քոչարյանի նկատմամբ խափանման միջոց ընտրված կալանավորման որոշումը՝ հաշվի առնելով, որ Քոչարյանն անձեռնմխելի է:

Այս ամենից ժամեր անց Հատուկ Քննչական ծառայությունը դեռևս որոշման հիմքերին ծանոթ չլինելով հայտարարեց, որ որոշման վերացումն ապօրինի է և, որ վերաքննիչ քրեական դատարանը դուրս է եկել իր լիազորությունների շրջանակից:

Աղբյուր` Փաստինֆո