Փաստ ինֆո

Հատուկ քննչական ծառայությունն իրավունք չունի ապօրինի որակել ուժի մեջ մտած դատական ակտը։ Այդ մասին լրագրողների հետ հանդիպմանն ասաց Ռոբերտ Քոչարյանի պաշտպաններից Հայկ Ալումյանը:

Փաստաբանի խոսքով՝ երբ ՀՔԾ-ն է խոսում, նա խոսում է Հայաստանի Հանրապետության անունից, իսկ եթե ինքն է քննադատում, խոսում է իր ու վստահորդի անունից։

«Բայց երբ ՀՔԾ-ն ինչ-որ մի դատական ակտ համարում է ապօրինի, դա ընկալվում է հետևյալ կերպ՝ ՀՀ-ն այդ ակտը համարում է ապօրինի։ Այդ հայտարարությունն է ապօրինի, ՀՔԾ-ն առավելագույնը կարող էր ասել, որ իրենք համամիտ չեն այդ դատական ակտի հետ։ Այստեղ ես տեսնում եմ հաճոյանալու ցանկություն»,-ասաց հայկ Ալումյանը։

Անդրադառնալով ՀՔԾ-ի այն հայտարարությանը, որ վերաքննիչ դատարանը կալանքի հիմքերի փոխարեն անդրադարձել է մեղադրանքին՝ պաշտպանն ասաց. «Հուսով եմ՝ ՀՔԾ-ին հայտնի է, որ նախքան հիմքերին անդրադառնալը դատարանն անդրադառնում է կալանավորման պայմաններին, եթե բոլոր պայմաններն առկա են, անդրադառնում է կալանավորման հիմքերին։

Պայմաններից մեկն անձի անձեռնմխելիության պայմանն է, իսկ պայմաններից մյուսը՝ հիմնավոր կասկածն է և այլն։ Եթե ՀՔԾ-ն այսքան բան հանրությանն առանց բացատրելու ասում է, և հանրությունն ընդունում է, որ ՀՔԾ-ն ճիշտ էր, դատարանը՝ սխալ, այդպես չի կարելի, մանիպուլյացիայի մեթոդ է»,- ասաց Հայկ Ալումյանը։

Ինչ վերաբերում է «0038» հրամանին, ապա պաշտպանն ասաց, որ այն ո′չ հրապարակված մասով և ո′չ էլ չհրապարակված մասով չի վերաբերում զորքի կիրառմանը, Ռոբերտ Քոչարյանն ընդամենը հրաման է տվել այնպես անել, որ զինված ուժերը հանկարծ չխառնվեն քաղաքական գործընթացներին:

Հայկ Ալումյանը անդրադարձավ նաև Վերաքննիչ դատարանում 2-րդ նախագահ Ռոբերտ Քոչարյանի ունեցած ելույթին և մի փոքր հատված հրապարակեց.

«Մենք ունեինք մի փորձ, որը մեր սեփական փորձը չէր, մեր թշնամու փորձն էր: Ո՞րն է դա: Ադրբեջանում 90-ականներին կար մի ապստամբ զինվորական` Սուրաթ Հուսեյնովը, որը որոշակի հեղինակություն ուներ զինված ուժերում և, օգտվելով դրանից, միացավ այնտեղի ըմբոստներին ու զորքի մի հատվածը շուռ տվեց այդ պահին իշխող վարչակազմի դեմ:

Գյանջայից զորքն ուղղվեց դեպի Բաքու: Արդյունքում Ադրբեջանը հարյուրավոր զոհեր ունեցավ մի խռովարար զինվորականի գործողությունների պատճառով: Իշխանությանը հաջողվեց ճնշել զինվորական ապստամբությունը, բայց այդ ընթացքում Ադրբեջանը կորցրեց նաև 3 տարածք»,- Ասաց Հայկ Ալումյանը՝ նշելով, որ Ռոբերտ Քոչարյանն իր խոսքում ասել է. «Մենք չէինք կարող մեզ թույլ տալ նման իրավիճակ»:

«Ռոբերտ քոչարյանի հայտարարության այս հատվածը «Մարտի 1-ին» չէր վերաբերում, վերաբերում էր փետրվարի 23-ին և «0038» հրամանին», - ասաց Հայկ Ալումյանը:

Աղբյուր` Փաստինֆո