Փաստ ինֆո

Հանրապետական խմբակցության պատգամավոր, նախկին ոստիկանապետ Ալիկ Սարգսյանը մտադիր է միջնորդություն ներկայացնել՝ Արարատի նախկին մարզպետ Վարդգես Հովակիմյանի նկատմամբ դատահոգեբուժական և դատահոգեբանական փորձաքննություն նշանակելու մասին:

Այդ մասին «Փաստինֆո»-ի թղթակցի հետ զրույցում ասաց Ալիկ Սարգսյանի պաշտպան Հայկ Ալումյանը:

 Վարդգես Հովակիմյանի կողմից հնչեցված մի շարք արտահայտություններ Ալիկ Սարգսյանին հիմք են տվել մտածելու՝ նրա ոչ այդքան ադեկվատ լինելու մասին， ինչի մասին նա ասել է փաստաբանին։

Ավելի վաղ տեղեկացրել էինք, որ Հանրապետական խմբակցության պատգամավոր, նախկին ոստիկանապետ Ալիկ Սարգսյանը քաղաքացիական հայց է ներկայացրել դատարան՝ պահանջելով պարտավորեցնել Արարատի նախկին մարզպետ Վարդգես Հովակիմյանին հրապարակայնորեն հերքել զրպարտչական տեղեկությունները և ներողություն խնդրել վիրավորական արտահայտությունների համար: Ինչ վերաբերվում է բարոյական վնասի դրամական հատուցմանը, ապա Ալիկ Սարգսյանը նման պահանջ չի ներկայացրել, քանի որ կարծում է, որ Վարդգես Հովակիմյանի խոսքն իրականում որեւէ արժեք չունի։

Հայկ Ալումյանի խոսքերով՝ իր վստահորդը չի ցանկացել գումարային պահանջ ներկայացնել, սակայն բացառված չէ, որ հետագայում բարոյական վնասի հատուցման պահանջ ևս ներկայացվի, որի գումարը կուղղվի որևիցե բարեգործական նպատակի:

Հիշեցնենք, որ հուլիսի 4-ին ՀՀ նախկին ոստիկանապետ Ալիկ Սարգսյանը հաղորդում է տվել այն մասին, որ ՀՀ Արարատի նախկին մարզպետ Վարդգես Հովակիմյանը 2012 թ. սկսած արատավորող տեղեկություններ հրապարակելու սպառնալիքով իրենից պահանջում է առանձնապես խոշոր չափերի` շուրջ 60.000 ԱՄՆ դոլար գումար։

Նյութերի նախապատրաստման ընթացքում Վարդգես Հովակիմյանը հայտարարել էր, թե, իբր, նախկին ոստիկանապետին գումար է տվել իր աշխատակցի որդուն ճանապարհային ոստիկանությունում աշխատանքի ընդունվելու համար։ Քննչական կոմիտեն երկու հաղորդումների հիման վրա քրեական գործ է հարուցել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, 312-րդ հոդվածի 3-րդ մասի 1-ին կետով, 313-րդ հոդվածի 1-ին մասով և 182-րդ հոդվածի 3-րդ մասի 2-րդ կետով նախատեսված` պաշտոնատար անձի կողմից առանձնապես խոշոր չափերով կաշառք ստանալու, նրան կաշառք տալու, կաշառքի միջնորդության և շորթման դեպքերի առթիվ և ուղարկել ըստ քննչական ենթակայության՝ ՀՔԾ։

Նախկին ոստիկանապետն անմիջապես արձագանքեց՝ նախկին մարզպետի հայտարարությունները որակելով հերյուրանք եւ զրպարտություն եւ մտադիր է հենց դատական կարգով ապացուցել, որ Վարդգես Հովակիմյանը զրպարտում է իրեն։

Աղբյուր` Փաստինֆո