Փաստ ինֆո

«Ռոբերտ Քոչարյանի և մնացածների դեմ հայտարարված հետապնդումը նոր իշխանության կողմից Լևոն Տեր-Պետրոսյանի քաղաքական և գաղափարական ազդեցության տակ վենդետա է քաղաքական ուժերի հանդեպ»: Այդ մասին այսօր լրագրողների հետ հանդիպմանն ասաց ՀՀ ԶՈՒ պահեստի գնդապետ, պատմական գիտությունների թեկնածու Վոլոդյա Հովհաննիսյանը:

Ըստ Հովհաննիսյանի՝ այս ամենի նպատակն այն է, որ այդ քաղաքական ուժերը ոչնչացվեն այն աստիճան, որ գալիք ընտրությունների ժամանակ նոր քաղաքական ուժերը՝ Նիկոլ Փաշինյանն ու իր համախոհների բանակը, կարողանան անպատժելի լինել և հեշտ գրավել քաղաքականությունը:

Վոլոդյա Հովհաննիսյանը, ով նշեց, որ առաջին բանակային կորպուսի հրամանատար է, լավ գիտի, որ «Մարտի 1»-ի դեպքերի ժամանակ բանակը չի օգտագործվել:

Այն, որ արտակարգ դրություն հայտարարելուց առաջ 0038 հրամանն է ընդունվել, և դրա համաձայն՝ զորք է բերվել Երևան և ուժեղացվել Երևանի կայազորը, բանախոսը գտնում է, որ հիշատակվող հրամանը հիմարություն էր, քանի որ այդ հրամանատարը՝ գեներալ լեյտենանտ Խաչատուրովը, Երևանի կայազորի պետն էր և նա կարող էր իր գործունեությունը ծավալել անգամ առանց այդ հրամանի. ի պաշտոնե սպաներն իրեն ենթակա էին և պիտի կատարեն նրա հրամանը:

«Մարտի 1-ին 10-ը զոհեր են եղել, և այդ զոհերը նույն չափով և՛ ընդդիմադիր ուժերի՝ Նիկոլ Փաշինյանի, Լևոն Տեր-Պետրոսյանի, ՀԱԿ-ի, և՛ այդ ժամանակվա իշխանության խղճին են: Եթե իշխանություններն ունեին զենք և ուժ ու դրա կիրառման հնարավորություն, ապա ընդդիմադիրներն ունեին կրքերը հանդարտեցնելու և բախումը կանխելու հնարավորություն»,- նշում է Հովհաննիսյանն ու հավելում, որ այսօր դատում են հետևանքն՝ առանց պատճառի: Իսկ հետևանքը իշխանության գործունեությունն է, իսկ պատճառը գործողությունները՝ ոստիկանների շղթային հարվածելը, մեքենա այրելը, ինչը չէին կանխում ընդդիմադիր ուժերը:

Այդ օրերին 10-ը զոհ է եղել և այդ զոհերը և՛ ժամանակի իշխանության, և՛ ընդդիմադիր գործիչների խղճին են, ուստիև՝ դրա համար իրավական ճիշտ և օբյեկտիվ գնահատական պետք է տրվի, ոչ թե վենդետա կատարվի:

Միևնույն ժամանակ բանախոսը չբացառեց, որ կարող է իշխանություն լինել և գալիք իշխանություններն էլ գտնեն, որ մեղավոր է ոչ թե հետևանքը, այլ պատճառը, և այդ ժամանակ կբերեն Լևոն Տեր-Պետրոսյանի ու Նիկոլ Փաշինյանի պատասխանատվության հարցը:

Աղբյուր` Փաստինֆո