Փաստ ինֆո

ՀՀ վարչապետ Նիկոլ Փաշինյանը իր 100-օրյա պաշտոնավարման արդյունքներն ամփոփելու նպատակով օգոստոսի 17-ին՝ ժամը 18:30-ին, հրավիրում է Հանրապետության հրապարակ հանրահավաքի: Այդ մասին Փաշինյանը հայտարարեց ֆեյսբուքյան ուղիղ հեռարձակման ժամանակ:

Վարչապետը նշեց, որ շուտով լրանում է իր պաշտոնավարման 100 օրը, և առաջարկում է օգոստոսի 17-ին Հանրապետության հրապարակում՝ ավանդական դարձած հանդիպման վայրում, մեծ հանրահավաք հրավիրել:

«Դուք չգիտեմ ինչպես, բայց ես ձեզ շատ եմ կարոտել: Ես ուզում եմ, որ մենք նորից շփվելու հնարավորություն ունենանք»,-ասաց Փաշինյանը:

Վարչապետը նաև ընդգծեց՝ սպասվում է չափազանց կարևոր իրադարձություն, որին յուրաքանչյուրի մասնակցությունը անհրաժեշտ է: Տեղի է ունենալու կարևոր խոսակցություն այն մասին, թե ինչ է տեղի ունեցել Հայաստանում նրա պաշտոնավարման 100 օրվա ընթացքում, կառավարությունն ինչ քայլեր է ձեռնարկել և ձեռնարկելու թռիչքաձև զարգացում ապահովելու համար:

«Պետք է խոսենք այն մասին, թե ինչ հնարավորություններ ու մարտահրավերներ կան, ինչպես ենք մենք կարողանալու դրանց հետ աշխատել. հնարավորությունները՝ օգտագործել, մարտահրավերները՝ կառավարել: Շատ կարևոր հանդիպում է՝ ապագայի կայուն հիմքերը դնելու և գործնականում Հայաստանի զարգացման մեկնարկը տալու առումով: Նաև խոսելու ենք այն խնդիրների մասին, որոնց այս ընթացքում բախվել ենք և որոնց կառավարմամբ ու լուծմամբ զբաղված ենք»,-ասաց վարչապետը:

Աղբյուր` Փաստինֆո