Փաստ ինֆո

ՀՀ-ում Եվրոպական միության պատվիրակության կողմից տարբեր ծրագրերի իրականացման համար հատկացված դրամաշնորհներից հափշտակության գործով մեղադրյալ, շուրջ 14 ամիս կալանքի տակ գտնվող Մարինե Պապյանն այլևս կալանքի տակ չէ:

«Փաստինֆո»-ի թղթակցի հետ զրույցում Մարինե Պապյանի պաշտպան Հունան Բաբայանը նշեց, որ դատարանը մասնակի բավարարել է իր միջնորդությունը և Մարինե Պապյանի նկատմամբ որպես խափանման միջոց ընտրված կալանավորումը փոխարինել է այլընտրանքային խափանման միջոց գրավով` գրավի չափը սահմանելով 10.000.000 ՀՀ դրամ:

Դատարանի որոշման հրապարակման օրը սահմանված գրավը վճարվել է, և Պապյանն ազատ է արձակվել:

Միևնույն ժամանակ նշենք, որ Հունան Բաբայանը միջնորդել էր իր պաշտպանյալի նկատմամբ ընտրված խափանման միջոց կալանավորումը փոխարինել անազատության հետ չկապված խափանման միջոցով կամ գրավի կիրառումը ճանաչել թույլատրելի:

Միևնույն ժամանակ պաշտպանը նշել է, որ Մարինե Պապյանի կալանավորման հիմքերը խիստ ենթադրական են, չպատճառաբանված, չանհատականացված, հիմնավորված չեն ինչպես քրեական գործի նյութերով, այնպես էլ՝ մեղադրյալի անձը բնութագրող տվյալներով:

Հունան Բաբայան ընդգծեց, որ իր պաշտպանյալը չի թաքնվել վարույթն իրականացնող մարմնից, ծանուցված լինելով՝ ներկայացել է քննչական վարչություն և ցուցմունք է տվել: Բացի այդ, նրա կողմից գործի քննությանը խոչընդոտելու հիմքը նույնպես չի հաստատվել, քանի որ քրեական գործը հարուցվել է դեռևս 2015 թվականի հոկտեմբերին և իր պաշտպանյալին կալանավորելու պահի դրությամբ քննվել է ավելի քան մեկուկես տարի:

Պաշտպանը դատարանին խնդրել էր, որ եթե դատարանը կգտնի կալանավորման հիմքերն առկա են, ապա գրավի կիրառումը ճանաչել թույլատրելի և գրավի չափ սահմանի 4.000.000 ՀՀ դրամ կամ ողջամիտ այլ գումար:

Նշենք նաև, որ հիշյալ քրեական գործ անցնում են 14 ամբաստանյալ և նրանցից միայն Մարինե Պապյանի նկատմամբ է խափանման միջոց կալանավորում ընտրված եղել՝ մյուսների նկատմամբ ընտրվել է չհեռանալու մասին ստորագրությունը:

Ավելի վաղ տեղեկացրել էինք, որ չարաշահումները ներառում են 18 դրամաշնորհային ծրագիր, իսկ հափշտակված գումարն ավելի քան 907 մլն դրամ է։

Գործով մեղադրանքներ են առաջադրվել ՀՀ-ում Եվրոպական միության պատվիրակության դրամաշնորհային ծրագրերի համակարգող Մարինե Պապյանին ՝ 18 դրվագով, Տիգրան Սուքիասյանին (15 դրվագով), Գարիկ Չիլինգարյանին (6 դրվագով), Ռուբինա Տեր-Մարտիրոսյանին՝ (4 դրվագով), Արմեն Բարեղամյանին (2 դրվագով), Գևորգ Ղազարյանին (2 դրվագով), Դինա Մանուկյանին (մեկ դրվագով), Ալեքսանդր Պողոսյանին (մեկ դրվագով), Սերգեյ Բալասանյանին (մեկ դրվագով), Կարեն Ստեփանյանին (մեկ դրվագով), Կարեն Ստեփանյանին (մեկ դրվագով), Արմեն Միքայելյանին (մեկ դրվագով), Արման Մկրտչյանին (4 դրվագով), Անահիտ Ավագյանին (4 դրվագով) և Նելլի Սեդրակյանին (2 դրվագով) մասերով:

Ավելի վաղ ՀՀ քննչական կոմիտեն տեղեկացրել էր, որ ՀՀ-ում Եվրոպական միության պատվիրակության կողմից հատկացված դրամաշնորհի գումարներից առանձնապես խոշոր չափերի հափշտակություն է կատարվել, ինչի առիթով հարուցվել է քրեական գործ: Հափշտակություններն սկսվել են 2009-2010 թվականներին:

Եվս 5 մեղադրյալի մասով նախաքննությունը շարունակվում է։

Աղբյուր` Փաստինֆո