Փաստ ինֆո

ՀՀ քննչական կոմիտեն նախաձեռնել է ընտրական հանցագործությունների գործերով քննությամբ զբաղվող քննիչների մասնագիտացման դասընթացներ, որի մեկնարկը տրվեց այսօր։ Բացման արարողությանը մասնակցում էին ՀՀ ՔԿ նախագահ Հայկ Գրիգորյանը,Կենտրոնական ընտրական հանձնաժողովի քարտուղար Արմեն Սմբատյանը, Վարչապետին առընթեր ընտրական օրենսգրքի բարեփոխումների հանձնաժողովի քարտուղար Դանիել Իոաննիսյանը։ Այս մասին տեղեկանում ենք Քննչական կոմիտեի պաշտոնական կայքից:

Ողջունելով հյուրերին և մասնակիցներին՝ ՀՀ ՔԿ նախագահը փաստեց, որ ընտրական հանցագործությունների դեմ պայքարի արդյունավետությունը մեր երկրի իրավական քաղաքականության առաջնահերթություններից մեկն է, ուստիև՝ ՀՀ քննչական կոմիտեն առաջին անգամ նախաձեռնել է կազմակերպել ընտրական հանցագործությունների քննությամբ զբաղվող քննիչների մասնագիտացման և վերապատրաստման դասընթացներ:

«Թեև գործող քրեական օրենսգրքով ընտրական հանցագործությունները տեղադրված են մարդու սահմանադրական իրավունքների դեմ ուղղված հանցագործությունների գլխում, սակայն, կարծում եմ, դրանք ըստ էության սահմանադրական կարգի դեմ ուղղված և հանրային վտանգավորության բարձր աստիճան ունեցող արարքներ են։ Ընտրական գործընթացն այն համակարգն է, որի միջոցով ձևավորվում է պետական և տեղական ինքնակառավարման համակարգը, պետական ինստիտուտները: Ընտրության միջոցով ժողովուրդն իրականացնում է իր իշխանությունը, ու եթե ընտրական գործընթացներում թույլ տրվեն խախտումներ, ապա դրանով կարող են խեղաթյուրվել և վտանգվել պետության սահմանադրական կարգի հիմքերը»,- ասաց Հայկ Գրիգորյանը։

ՔԿ նախագահը կարևորեց ընտրական գործընթացների ժամանակ հնարավոր հանցագործությունների կանխարգելումը, որի արդյունավետության առաջնային նախապայմաններից է դրանց պատշաճ քննությունը,համարժեք քրեաիրավական գնահատական տալն ու պատժողական քաղաքականությունը։

«Պետք է հստակ արձանագրենք, որ պետության ժողովրդավարության աստիճանը որոշվում է ոչ միայն մարդու և քաղաքացու հիմնական իրավունքների և ազատությունների հռչակմամբ և օրենսդրական ամրագրմամբ, այլև՝ առավելապես դրանց իրական պաշտպանությամբ։ Մարդու և քաղաքացու սահմանադրական իրավունքների ու ազատությունների երաշխիքների համակարգում կարևոր տեղ է զբաղեցնում դրանց քրեաիրավական պաշտպանությունը, որը մարդու և քաղաքացու իրավունքների ու ազատությունների հանցավոր խախտումների դեմ պայքարի, հանրորեն վտանգավոր ոտնձգություններից նրանց օրինական շահերի պաշտպանության առավել խիստ և գործուն միջոցն է: Սակայն այդ պաշտպանության արդյունավետությունը կախված է ոչ միայն քրեական օրենսգրքով համապատասխան նորմերի ամրագրումից, այլև՝ գործնականում դրանց ճշգրիտ կիրառումից»,- նշեց ՔԿ նախագահը։

Առաջին փուլում կվերապատրաստվեն Երևան քաղաքի քննչական վարչության, վարչական շրջանի քննչական բաժնների 23 քննիչ՝ նկատի ունենալով, որ առաջիկայում նախատեսված են Երևանի ավագանու ընտրությունները։

«ՀՀ քննչական կոմիտեն առաջնային է համարում ընտրական հանցագործությունների դեմ արդյունավետ պայքարը: Այդ նպատակով նախատեսում ենք ունենալ այդ հանցագործությունների քննությամբ մասնագիտացված քննիչներ, և նկատի ունենալով ընտրական օրենսդրության դինամիկ և շարունակական կատարելագործումն ու զարգացումը, դրանով պայմանավորված քրեական օրենսգրքում հաճախակի իրականացնող փոփոխությունները՝ կարևորում ենք նաև քննիչների շարունակական վերապատրաստման գործընթացը, ոլորտի հիմնախնդիրներին տեղեկացվածության աստիճանը բարձրացնելու մեր հանձնառությունը: Վստահ եմ, որ վերապատրաստման այս դասընթացների արդյունքում քննիչները ձեռք կբերեն ընտրական իրավունքի վերաբերյալ անհրաժեշտ գիտելիքներ, որոնք կնպաստեն այս արարքների ճիշտ քրեաիրավական որակմանը, կբարձրացնեն ընտրական հանցագործությունների քննության արդյունավետությունը»,- ասաց ՔԿ նախագահը և ընդգծեց, որ այդօրինակ հանցագործությունների դեպքերի քննությունը գտնվելու է իր անմիջական հսկողության ներքո։

ՀՀ ԿԸՀ քարտուղար Արմեն Սմբատյանը և Վարչապետին առընթեր ընտրական օրենսգրքի բարեփոխումների հանձնաժողովի քարտուղար Դանիել Իոաննիսյանը բարձր գնահատեցին Քննչական կոմիտեի նախաձեռնությունը՝ այն համարելով աննախադեպ։ Ա.Սմբատյանի դիտարկմամբ՝ քննության արդյունավետությունը բարձրացնելու ուղղությամբ ՔԿ-ի կողմից ձեռնարկվող քայլերը կարևոր ազդեցություն կունենան ընտրական գործընթացի նկատմամբ վստահության բարձրացման գործում, քանի որ մեր հասարակությունը հետևում է ոչ միայն նախընտրական, այլ նաև՝ հետընտրական զարգացումներին։

«Աննախադեպ իրավիճակ է, երբ տեսնում ենք, որ քննչական կոմիտեն, քննչական մարմինը գործուն միջոցներ է ձեռնարկում ընտրական հանցագործությունների դեմ պայքարի արդյունավետության համար։ Խիստ կարևոր է ցույց տալ, որ իշխանությունները ձևավորվում են ընտրությունների միջոցով, որ քաղաքացին է իր ընտրությամբ ձևավորում իշխանությունը»,- ասաց Դ.Իոաննիսյանը։

ՀՀ ՔԿ նախագահի տեղակալ Արթուր Ղամբարյանը տեղեկացրեց, որ դասընթացը կիրականացվի 3 ուղղությամբ՝ քաղաքագիտական, սահմանադրաիրավական և քրեաիրավական՝ կարևորելով քննիչների համակողմանի վերապատրաստումը։ Ընդ որում՝ սա փորձնական ծրագիր է, որից հետո այն կլրամշակվի և համապետական նշանակություն ունեցող խորհրդարանական ընտրություններին ընդառաջ վերապատրաստման դասընթացներ կիրականացվեն նաև մարզային քննչական վարչությունների քննիչների համար:

Աղբյուր` Փաստինֆո