Փաստ ինֆո

Երևանի ընդհանուր իրավասության առաջին ատյանի դատարանը  Հայաստանի երկրորդ նախագահ Ռոբերտ Քոչարյանի նկատմամբ որպես խափանման միջոց  կալանավորումն ընտրելու մասին Հատուկ քննչական ծառայության միջնորդության քննարկումը հետաձգել է եւ այն կվերսկսվի այսօր՝ ժամը 11-ին:

Պաշտոնաթող նախագահի պաշտպան Ռուբեն Սահակյանը հայտարարել է, որ Ռ.Քոչարյանը կներկայանա դատական նիստին պատշաճ ծանուցման դեպքում։

«Մի քանի ժամվա համար չէր խուսափի։ Նա չի ստացել ծանուցագիր։ Վաղը 11-ին կլինի դատարանում։ Ես հիմա չեմ կարող գնալ նրա տուն։ Ռոբերտ Քոչարյանի այն մարդը չէ, որ խուսափի։ Եթե խուսափելու լիներ, չէր վերադառնա», - ասել է Ռ.Սահակյանը։

Մինչ դատարանը կքննարկի եւ իր դիրքորոշումը կհայտնի սահմանադրական անձեռնմխելիության պայմաններում երկրորդ նախագահին առաջադրված մեղադրանքի ու խափանման միջոց ընտրելու հարցի վերաբերյալ՝ հայտնի իրավաբանները տարակուսանք են հայտնում ստեղծված իրավիճակի վերաբերյալ։ Մասնավորապես նրանք զարմացած են, թե ինչպես է շրջանցվել Սահմանադրական անձեռնմխելիությունը և ինչպես է մեղադրանք առաջադրվել 2008 թվականի ընտրությունների արդյունքների վերաբերյալ ԿԸՀ եւ ՍԴ որոշման պայմաններում։ Այս մասին մի շարք հայտնի փաստաբաններ գրառումներ են կատարել ֆեյսբուքում։

Փաստաբան Երեմ Սարգսյանը գրում է. «ՀՀ նախկին և գործող Սահմանադրություններով /հոդվածներ 56.1-րդ և 140-րդ/ հստակ սահմանված է, որ. «Հանրապետության Նախագահն անձեռնմխելի է:

Հանրապետության Նախագահն իր լիազորությունների ժամկետում և դրանից հետո չի կարող հետապնդվել և պատասխանատվության ենթարկվել իր կարգավիճակից բխող գործողությունների համար:

Իր կարգավիճակի հետ չկապված գործողությունների համար Հանրապետության Նախագահը կարող է պատասխանատվության ենթարկվել իր լիազորությունների ավարտից հետո »: Իրավական առումով շատ հետաքրքիր է, թե ինչ կերպ է շրջանցվել սահմանադրական այս նորմը»:

Փաստաբան Երվանդ Վարոսյանը հիշեցնում է, որ 2008 թվականի նախագահական ընտրությունների արդյունքների վերբերյալ կան ՍԴ, ԿԸՀ որոշումները եւ օրինական ուժի մեջ մտած մի շարք դատավճիռներ։ «Հիշեցում. առկա է ՀՀ ԿԸՀ որոշում, Սահմանադրական դատարանի որոշում, 100-ից ավել օրինական ուժի մեջ մտած դատավճիռներ, որոնցով հաստատված է համարվել, թե 2008 թվականի փետրվարի 19-ի ընտրություններին հաղթել է Սերժ Սարգսյանը։ Դատավճիռներով հաստատված է համարվել նաև, թե պարտությունից դժգոհ որոշ ընդդիմադիրներ ջղայնացել են, ոստիկանների ծեծել, զանգվածային անկարգություններ կազմակերպել ու իրականացրել և այլն, և այլն։
Կարող է անհետաքրքիր հնչի հիմա, բայց ինձ առավելապես հուզում է այդ որոշումների ու դատավճիռների կայացման պատմության բացահայտումը, այդ որոշումների ու դատավճիռների ճակատագիրը, դրանց հեղինակների դիրքորոշումը... թե չէ. я начальник ты дурак, ты начальник я дурак հին ռուսական ասացվածքը հեծնած երկար պտտվելու ենք ու վերադառնանք նույն կետին»։

 Փաստաբան Տիգրան Աթանեսյանը զուգահեռ է անցկացրել Լինչի դատաստանի հետ։

«Ռոբերտ Քոչարյանի փաստաբանների անունները չեն նշվում ու ասեմ ձեզ, որ արդար դատաքննության տեսակետից դա արդեն վատ է։

ՀՀ քրեական օրենսգրքի 300.1 հոդվածով մեղադրանք առաջադրելը, այսինքն մի հոդվածով, որը ընդունվել է 2009 թվականին,դեպքերից մեկ տարուց ավելի անց, դա քրեական իրավունքի գիտության հանդեպ ծաղր է։ Չեմ զարմանա, եթե այս ամենը սխալ խորհրդատվության հետևանք է կամ էլ հատուկ ական, դրված այս գործի տակ։ Քոչարյանի դատավարությունը լինելու է պատմական նշանակության, առաջին անգամ դատվելու է մեր պետության ղեկավարը (Քաջազնունու դեպքը չհաշված) և սա պետք է դաս լինի Հայաստանի բոլոր հետագա իշխանությունների համար, ուստի իրավաբանական առումով այն պետք է լինի անխոցելի։ Հակառակ դեպքում դատավարությունը կնմանվի Լինչի դատաստանի և ժամանակ անց կդրվի կասկածի տակ ապագա սերունդների կողմից»,- նշվում է նրա ֆեյսբուքյան գրառման մեջ։

Հիշեցնենք, որ ՀՔԾ-ն հուլիսի 26-ին հայտնել է 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ  քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա  Հայաստանի Հանրապետության պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։

Նույն օրը միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար:

Աղբյուր` Փաստինֆո