Փաստ ինֆո

ՀՀ երկրորդ նախագահ Ռոբերտ Քոչարյանը կարծում է, որ Մարտի 1-ի գործով իրեն մեղադրանք առաջադրելով՝ ներկայիս իշխանությունները փորձում են կանխել առաջիկա ընտրություններին իր հնարավոր մասնակցությունը:

«Մտածում են մոտակա, սպասվելիք արտահերթ ընտրություններին իմ հնարավոր մասնակցության մասին ու էն գլխից փորձում են չեզոքացնել ինձ: Ինձ ուզում են կտրել քաղաքական գործընթացներից։ Թեկուզ վերջին տասը տարվա ընթացքում բազմիցս հայտարարել եմ, որ քաղաքականությամբ զբաղվելու ցանկություն չունեմ, բայց սա այն դեպքն է, որ արդեն դու քաղաքականությամբ չես զբաղվում, այլ քաղաքականությունն է սկսում քեզանով զբաղվել», - «Երկիր Մեդիա» հ/ը տված հարցազրույցում ասաց Ռոբերտ Քոչարյանը:

Նա ընդգծեց՝ իր իշխանության ժամանակ Հայաստանը տնտեսական աճ է ապրել ու հասարակությունը հիշում է դա:

«Գիտեք, մարդիկ հասկանում են, որ միայն իմ ժամանակահատվածում էր, որ երկրի տնտեսությունն էական զարգացում է ապրել, հինգ անգամ աճել է երկրի համախառն ներքին արդյունքը: Մենք աշխարհի ամենից արագ զարգացող երկրների հնգյակում ենք եղել կամ տասնյակում: Տնտեսական միջին աճը եղել է 10,5 տոկոս տարեկան: Մի քանի պետություն են ընդամենը նման աճ ապահովել: Մարդիկ հիշում են: Այն ժամանակ կայացավ փոքր ու միջին բիզնեսը: Համանախառն ներքին արդյունքի 12 տոկոսից դարձավ 44 տոկոս: Մարդիկ  հասկանում են, որ նման, այսպես ասենք, նման «բագաժով» մարդը կարող է իրենց համար վտանգ լինել ընտրությունների ժամանակ», - ասաց ՀՀ երկրոդ նախագահը։ 

«Ի դեպ, նախկին իշխանությունը ևս մտահոգ էր միշտ այդ հարցով և ոնց որ իմ կերպարը հանգիստ չի տալիս, ով էլ գա իշխանության` պետք է անընդհատ ինձանից մտահոգված լինի», - ընդգծեց նա։

Ինչ վերաբերում է իրեն առաջադրված մեղադրանքին, ապա երկրորդ նախագահը հայտարարել է, որ այն ամբողջությամբ հորինված է, շինծու, քաղաքական ենթատեքստ ունեցող և իրականության հետ որևէ առնչություն չունեցող։

«Լայն զանգվածների տրամադրությունը փորձում են տեղափոխել իրավական դաշտ, և ըստ էության, ստացվում է, որ 21,5 տոկոս հավաքած Լևոն Տեր-Պետրոսյանը հաղթել է 2008 թվականի ընտրույթունները: Սա իրականությունից շատ-շատ հեռու է, որևէ առնչություն չունի և սա ակնհայտ քաղաքական հետապնդում է, վենդետա է թավշյա հեղափոխության, սիրո և համերաշխության կարգախոսի ներքո», - նշեց Ռոբերտ Քոչարյանը:

Նա ասաց, որ երբեք չէր մտածի, որ իրականության մեջ հնարավոր է այսպիսի շինծու քրեական գործ հարուցել:

Այսօր ավելի վաղ ՀՔԾ-ն հայտնել է, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա  Հայաստանի Հանրապետության պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։

Նույն օրը միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար:

Աղբյուր` Փաստինֆո