Փաստ ինֆո

Հայաստանի երկրորդ նախագահ Ռոբերտ Քոչարյանը այսօր Հատուկ քննչական ծառայությունում ցուցմունք չի տվել։ Նա այդ մասին հայտարարել է Ռ.Քոչարյանը՝ «Երկիր Մեդիա» հեռուստաընկերության եթերում։

«Ես հատուկ եկել եմ ցուցմունք տալու համար որպես վկա կարգավիճակում, սակայն երբ ինձ հայտարարեցին, որ իմ կարգավիճակը մեղադրյալի կարգավիճակ է, ես հրաժարվեցի ցուցմունք տալ», - ասել է Ռ.Քոչարյանը։

Նրա խոսքով, ինքն ապշել է մեղադրանքին ծանոթանալով։ Այդուհանդերձ պաշտոնաթող նախագահը հայտարարել է, որ կպայքարի մինչև վերջ։ «Կգնամ, կնստեմ, կպայքարեմ մինչև վերջ։ Ո՞ւր պետք է փախչեմ», - ասել է նախկին նախագահը։

Այսօր ավելի վաղ ՀՔԾ-ն հայտնել է, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա  Հայաստանի Հանրապետության պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։

Նույն օրը միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար:

ՀՀ երկրորդ նախագահ Ռոբերտ Քոչարյանն իրեն առաջադրված մեղադրանքը «իրավական սյուռռեալիզմ» է համարում:

«Ես, իբրև գործող նախագահ, սահմանադրական կարգի կրողն էի և այդ կարգի երաշխավորողն էի և ես ինքս ինձ տապալե՞լ եմ ինչ-որ տարօրինակ ձևով և այդ տապալմանը մասնակցել է բանակի վերնախա՞վը», -ասաց Ռոբերտ Քոչարյանը:

Նա ընդգծեց՝ Լևոն Տեր-Պետրոսյանը 2008-ի նախագահական ընտրություններից դեռ երկու շաբաթ առաջ էր հայտարարում, որ ընտրվել է:

«Ես լավ հիշում եմ այդ օրերը: Իսկ ընտրություններից հետո հրապարակում ուղղակի հայտարարել է, որ ինքն ընտրյալ նախագահ է և պետք է քայլեր ձեռնարկել պետական համակարգը կազմալուծելու ուղղությամբ: Այս ամբողջը ձայնագրված է, եթեր էր գնում բոլոր ալիքներով, բոլոր լրատվամիջոցներում հրապարակվել է այս ամենը: Սահմանադրական կարգի նկատմամբ ոտնձգություն արվել է հենց ընդդիմության կողմից, Լևոն Տեր-Պետրոսյանի կողմից: Իրենք են չընտրված 21,5 տոկոսով հայտարարել, որ իրենք արդեն ընտրվել են և պետք է կազմալուծեն պետական համակարգը: Եվ, ըստ էության, թե մենք ի՞նչ սահմանադրական կարգ ենք տապալել ուղղակի չգիտեմ: Հիվանդ երևակայություն պետք է մարդ ունենա, որ ընդհանրապես ենթադրի, որ սա հնարավոր մի բան է», - ասաց ՀՀ երկրորդ նախագահը:

Նրա խոսքով իրեն նման մեղադրանք առաջադրելուց առաջ արդեն իսկ պետք է բանտերում լինեին Կենտրոնական ընտրական հանձնաժողովի անդամներն ու Սահմանադրական դատարանի վերաբերյալ ինչ-որ ակտեր լինեին:

«Սա ուղղակի իրավական սյուռռեալիզմ է: Կուշտունիցան երևի կերազեր մեր այս որոշման մակարդակի երևակայություն ունենար իր ֆիլմերն անելուց: Սա վտանգավոր է հենց երկրի համար: Սա մի ռումբ է մեր պետականության տակ», - ասաց Ռոբերտ Քոչարյանը:

Աղբյուր` Փաստինֆո