Փաստ ինֆո

Վերաքննիչ դատարանը մերժել է Ազգային Օլիմպիական կոմիտեի նախագահ Գագիկ Ծառուկյանի օգնական Էդուարդ Բաբայանի նկատմամբ կալանավորումն ընտրելու վերաբերյալ առաջին ատյանի դատարանի որոշման դեմ պաշտպանի բերած բողոքը՝ անփոփոխ թողնելով առաջին ատյանի դատարանի որոշումը: «Փաստինֆո»-ն այդ մասին տեղեկացավ Էդուարդ Բաբայանի պաշտպան Արմեն Մելքոնյանից:

Պաշտպանը նաև հայտնեց, որ մերժվել է նաև գրավի միջնորդությունը:

Վճռաբեկ բողոք կներկայացվի, թե՝ ոչ, դեռևս հայտնի չէ, պաշտպանը նշեց, որ վերաքննիչ դատարանի որոշումը դեռևս չեն ստացել, ստանալուց հետո միայն որոշում կկայացվի:

Ավելի վաղ հատուկ քննչական ծառայությունը տեղեկացրել էր, որ հուլիսի 2-ին` «Օլիմպավան» մարզահամալիրում, Հայաստանի օլիմպիական կոմիտեի նախագահ Գագիկ Ծառուկյանի մասնակցությամբ տեղի ունեցած Հայաստանի բռնցքամարտիկների ֆեդերացիայի ժողովի ավարտից հետո` ժամը 18:30-ի սահմաններում, Վ. Հարությունովը մոտեցել է Գագիկ Ծառուկյանին` կրկին հիշեցնելով որդու հարցը կարգավորելու վերաբերյալ նախկինում նրա տված խոստումը:

Խոսակցությունը շարունակվել է մարզահամալիրի հանդիպումների դահլիճում, որտեղ, Էդուարդ Բաբայանը` խմբով, Վ. Հարությունովին մարմնական վնասվածքներ պատճառելու դիտավորությամբ, հարվածներ է հասցրել նրա մարմնի տարբեր մասերին` վերջինիս պատճառելով կյանքին վտանգ սպառնացող ծանր վնաս` գլխուղեղի ցնցման, դեմքի և կրծքավանդակի վնասվածքների, կողոսկրի կոտրվածքի և աջակողմյան պնևմոթորաքսի ձևով` ուղեկցված սուր շնչառական անբավարարությամբ:

Էդուարդ Բաբայանին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով:

Աղբյուր` Փաստինֆո