Փաստ ինֆո

Հանրապետական խմբակցության պատգամավոր, նախկին ոստիկանապետ Ալիկ Սարգսյանը համարում է, որ Արարատի նախկին մարզպետ Վարդգես Հովակիմյանը հոգեկան խնդիրներ ունեցող անձ է, և ինքը միջնորդելու է հարուցված քրեական գործի շրջանակներում դատահոգեբուժական փորձաքննություն նշանակել:

Այսօր լրագրողների հետ հանդիպմանը Սարգսյանը նշեց, որ այն պահից, երբ 2011թ նոյեմբերի 1-ից ազատվել է ոստիկանապետի պաշտոնից, ամիսներ անց Արարատի նախկին մարզպետ Վարդգես Հովակիմյանն իրեն մեղադրում է իր անհաջողությունների մեջ:

Սարգսյանի խոսքով՝ այս ամենին սկզբնական շրջանում լուրջ չի վերաբերվել, սակայն տարիներ շարունակ նամակների տեսքով, ինչպես նաև տարբեր անձանց միջոցով փորձել է իրենից գումարներ շորթել՝ պատճառաբանելով, թե մեծ վնասներ է կերել իր պատճառով:

Նախկին ոստիկանապետը նշեց նաև, որ Վարդգես Հովակիմյանը մարզպետ նշանակվելուց հետո հասկացել է, որ չի կարող չարաշահումներ իրականացնել մարզպետի պաշտոնում, ուստիև՝ սկսել է իր դեմ ուղղված գործողություններ իրականացնել։

Ըստ Սարգսյանի՝ Վարդգես Հովակիմյանի հայտարարություններն իր հետ որևէ առնչություն չունեն, տրամաբանությունից դուրս են:

Միևնույն ժամանակ, Ալիկ Սարգսյանը հայտնեց, որ վաղն առաջին անգամ ՀՔԾ-ում քննվող քրեական գործով պատրաստվում է գնալ և ցուցմունք տալ, իսկ այսօր արդեն քաղհայցով դիմելու է դատարան ու պատիվ պահանջելու Հովակիմյանից՝ իր հասցեին անտեղի հերյուրանքներ հնչեցնելու համար:

Նախկին ոստիկանապետը, որպես բարոյական վնասի փոխհատուցում, պահանջելու է 1 լումա, սակայն իր համար կարևորն այն է, որ իրեն զրպարտած անձը ներողություն խնդրի մասսայական:

Ալիկ Սարգսյանը տարօրինակ համարեց արտաշատցիների լռությունը տեղի ունեցածի առնչությամբ. բոլորը ճանաչում են և՛ իրեն և՛ Հովակիմյանին, քանի որ երկուսն էլ արտաշատցի են, սակայն այս պահին բոլորը լռում են ու չեն բարձրաձայնում, որ ինքը երբեք նման վարքագիծ չի դրսևորել։

Հիշեցնենք, որ, ըստ շրջանառվող տեղեկությունների, Վարդգես Հովակիմյանը շանտաժի է ենթարկել Ալիկ Սարգսյանին` պահանջելով վճարել նախկինում իր կրած ֆինանսական տույժերը, ինչի մասին էլ պատգամավորը հաղորդում էր ներկայացրել ՀՔԾ:

Աղբյուր` Փաստինֆո