Փաստ ինֆո

Հայաստանի վարչապետ Նիկոլ Փաշինյանը բացառում է, որ երկրում կլինեն արտոնյալ գործարարներ: Կառավարությունում հրավիրված մամուլի ասուլիսի ժամանակ խոսելով Հայաստանում ներդրումային հնարավոր հոսքի մասին՝ վարչապետն ընդգծեց, որ կա մեծ հետաքրքրություն, կան հստակ ծրագրեր ու նախագծեր, որոնց մասին, սակայն, իրենք կհայտարարեն միայն այն ժամանակ, երբ դրանք կանցնեն անշրջելիության կետը:

«Մենք պատրաստվում ենք ստեղծել հնարավորություններ, նորմալ որակի ենթակառուցվածքներ, օրենքի առաջ բոլոր մարդկանց հավասարություն, տնտեսության ոլորտների նկատմամբ հավասար հասանելիություն, երաշխավորել ներդրումների անվտանգությունը, բացառել կոռուպցիան»,- հայտարարեց Փաշինյանը:

Նա նշեց, որ գործարարների հետ հանդիպմանը մշտապես ասում է, որ նրանց առաջ երկու խնդիր է դնում. «Ես ասում եմ, որ նախ՝ մենք ուզում ենք, որ դուք, կոպիտ ասած, փող աշխատեք: Մեր շահն այն է, որ դուք այդ ընթացքում ստեղծեք աշխատատեղեր ու վճարեք հարկեր: Որևէ ուրիշ պարտավորություն դուք չունեք: Որևէ մեկը՝ հարկայինից, ոստիկանությունից կամ այլ պետական մարմնից, իրավունք չունի ձեզ համար պարտավորություն առաջացնել: Մենք ունենք մի պայման՝ աշխատում եք օրինական դաշտում, բոլորի հետ հավասար պայմաններում»,- ասաց ՀՀ վարչապետը:

Նա նշեց՝ տեղյակ են, որ կան խնդիրներ ստեղծող օրենքներ, դրանք պետք է միասին քննարկել ու փոփոխություններ իրականացնել: «Բայց օրենքը պետք է լինի անառարկելի, և սա պետք է տարածվի բոլորի համար: Բացառում ենք, որ Հայաստանի Հանրապետությունում կլինեն արտոնյալ գործարարներ: Սա է կառավարության անելիքը: Մենք պատրաստվում ենք բոլոր գործարարներին ոգևորել, որ նրանք իրենց ինքնադրսևորման համար նոր հնարավորություններ տեսնեն: Մենք հիմա ստեղծում ենք մի հարթակ ազգային տնտեսական ներուժի դրսևորման համար: Համոզված ենք, որ այդ հարթակը ստեղծելու ենք: Մենք պետք է մարդկանց ոգևորենք, լիցք հաղորդենք, որ, այո՛, միասին ի վիճակի ենք լինելու նոր տնտեսական ճեղքում ապահովել»,- հայտարարեց Փաշինյանը:

Նա նշեց, որ կառավարությունը կամ վարչապետը, որպես էդպիսին, չի կարող տնտեսություն զարգացնել, նա կարող է ստեղծել հնարավորություն, որ ազգային և ոչ միայն ազգային լավագույն ներուժը ներգրավվի այդ գործին: «Մենք համոզված ենք, որ մեր ժողովուրդն ունի այդ ներուժը»,- հայտարարեց կառավարության ղեկավարը:

Աղբյուր` Փաստինֆո