Փաստ ինֆո

Հուլիսի 14-ին Վայոց Ձորի Գնդեվանք ուխտի մենած Գարեգին Բ Ամենայն Հայոց Կաթողիկոսի նկատմամբ հնչեցված սպառնալիքների, ինչպես նաև հայրապետի տեղաշարժը արգելափակելու դեպքերի վերաբերյալ մամուլում առկա հրապարակումների հիման վրա Քննչական կոմիտեի Վայոց Ձորի մարզի քննչական վարչությունում նյութեր են նախապատրաստվում: «Փաստինֆո»-ն այդ մասին տեղեկացավ Քննչական կոմիտեի նախագահի խորհրդական Սոնա Տռուզյանից:

Հիշեցնենք， որ հուլիսի 14-ին  արտակարգ իրավիճակ էր ստեղծվել Վայոց ձորի մարզում ուր «Նոր Հայաստան, նոր հայրապետ» շարժման ակտիվիստները շրջափակել են Ամենայն Հայոց Կաթողիկոս Գարեգին Բ-ի մեքենան։ Տեր Վահրամ Մելիքյանի փոխանցմամբ՝  Գարեգին Բ Ամենայն Հայոց Կաթողիկոսը ուխտի էր մեկնել Գնդեվանք (Վայոց Ձորի թեմ), որտեղ հայտնի նախաձեռնության անդամներն արգելափակել են Վեհափառ Հայրապետի տեղաշարժը եւ շրջափակել Նորին Սրբության մեքենան։ «Գնդեվանքից վերադարձի ճանապարհը փակ է մեքենաներով և քարերով, նախաձեռնության անդամները սպառալիքներ են հնչեցնում։ Վեհափառն անվհանգ դուրս է եկել շրջափակումից միայն ոստիկանների ժամանումից հետո։

Ջերմուկի տարածաշրջանի և Գնդեվանքի հոգևոր հովիվ Տեր Գալուստ քահանա Սահակյանն իր ֆեյսբուքյան էջում հուլիսի 15-ին գրառել էր, որ Գարեգին Բ Վեհափառ Հայրապետը ուխտագնացության և Գնդեվանքի տարածքում 2011 թվականից ի վեր ճգնավորության ուղին ընտրած յոթ վանականների հետ հանդիպման նպատակով մեկնել է ուխտի, նրան դիմավորելուց հետո շրջել են վանքի տարածքում, ապա Գալուստ Սահակյանի հետ առանձնացել են համալիրի խոհանոցում` վանքի նորոգման եւ վանական կյանքի վերականգնման մասին զրուցելու համար։

«Որոշ ժամանակ էր արդեն զրուցում էինք, երբ անօրեն ու անշնորհք կերպով ներս խուժեցին Կորյուն աբեղան եւ իր աջակիցները` անշնորհք պահվածքով ու լուտանքներ տեղալով Վեհափառի ու բոլորիս հասցեին։ «Մենք Ձեզ մեկ ամիս այստեղ պետք է պահենք»,- ասում էր Կորյուն աբեղան։

Սկզբում Վեհափառին մոտեցավ Էդգար անունով մեկը, ով տեսակցություն խնդրեց նրանից հաջորդող օրը, ինչին Վեհափառը սիրով համաձայնեց՝ ասելով, թե նախկինում եւս չի խուսափել որեւէ մեկ հավատացյալի հետ հանդիպելուց։ Այս ընթացքում այդպիսի համդիպում եւս եղել է։

Թվում էր, թե այս տհաճ միջադեպը հարթված է Վեհափառի հանգստության եւ սիրալիրության շնորհիվ։ Բայց երբ Էդգարը տեղեկացրեց Կորյուն աբեղային հաջորդ օրը հանդիպելու մասին, վերջինս հրամայեց նրան չխառնվել ու փոխարենը պնդեց, որ Վեհափառին շրջապատել են ու պետք է 30 օր պահեն մեր վանքում։

Վեհափառը, իր հայրական ու հայրապետական հանգստության մեջ, ասաց, որ սպառնալիքների տակ երբեք որեւէ մեկի հետ չի հանդիպի ու խոսի, եւ պահանջեց բացել իր ճանապարհը։
Կորյուն աբեղան շարունակեց իր լուտանքները եւ ոչ պատշաճ կեցվածքը։

Նշեմ նաև, որ ներկաների մեջ կային դեմքի անբնական արտահայտություն ունեցող մարդիկ, որոնք ունեին ոչ ադեկվատ կեցվածք եւ իրենց բղավոցներով ու վանկարկումներով էլ ավելի էին սրում իրավիճակը:

Վեհափառը դուրս եկավ խոհանոցից, մենք գտանք այնտեղ իր արգելափակված մեքենան, ապա փորձեցինք Վեհափառին պաշտպանելու համար մեկ այլ մեքենայով իրեն ճանապարհել Էջմիածին, որը եւս արգելափակվեց։ Դրանից հետո տեղի ունեցած զարգացումները բողոքի մասնակիցների կողմից արդեն իսկ տեսանյութերով հրապարակվել են։

Ինչպես մեր հոգեւոր հայրերը դարերի ընթացքում, այսօր եւս մենք զորավոր ենք հավատավոր ժողովրդի, եկեղեցու բարեկամների աղոթքներով եւ կարող ենք ինքներս պաշտպանել մեր սրբազան տաճարները եւ ինքներս մեզ»,- գրառել էր Ջերմուկի տարածաշրջանի և գնդեվանքի հոգևոր հովիվ՝ Տեր Գալուստ քահանա Սահակյան։

Աղբյուր` Փաստինֆո