Փաստ ինֆո

ՀՀ երրորդ նախագահ Սերժ Սարգսյանի եղբոր որդին՝ Հայկ Սարգսյանն իրեն առաջադրված մեղադրանքը չի ընդունում: Այդ մասին «Փաստինֆո»-ի թղթակցի հետ զրույցում հայտնեց Հայկ Սարգսյանի պաշտպան Երեմ Սարգսյանը:

Պաշտպանը նշեց, որ իր պաշտպանյալի նկատմամբ որպես խափանման միջոց ընտրված կալանավորման որոշումը՝ բողոքարկվելու է վերաքննիչ դատարան:

Անդրադառնալով քրեական գործին Երեմ՝ Սարգսյանն ասաց, որ թույլ են տրվել մի շատ խախտումներ, մասնավորապես՝ իրենց չեն ներկայացվել փորձագետների եզրակացությունները, այնպիսի իրավիճակ է ստեղծվել, որպեսզի պաշտպանական կողմը չկարողանա իրականացնել պաշտպանություն:

Պաշտպանական կողմին չտրամադրված գործի նյութերի մասին Երեմ Սարգսյանը միջնորդություն է ներկայացրել դատարան, որը բավարարվել է մասնակի:

Ինչ վերաբերում է մամուլում շրջանառվող տեղեկություններին, թե Հայկ Սարգսյանը փորձել է փախչել և նրան օդանավակայանից բերման են ենթարկել, ըստ պաշտպանի՝ ապատեղեկատվություն է, Հայկ Սարգսյանը ընտանիքի և անչափահաս երեխաների հետ հանգստի է ցանկացել մեկնել, քանի որ արձակուրդում է գտնվել:

Իսկ մինչ նրան բերման ենթարկելը, պաշտպանի վստահեցմամբ, Սարգսյանը որևէ ծանուցում չի ստացել՝ ավելին, քրեական գործի մասին ո՛չ իրավապահներ են պաշտոնապես տեղեկություն տարածել, ո՛չ մամուլում է եղել:

Միևնույն ժամանակ Երեմ Սարգսյանը նշում է, երբ Հայկ Սարգսյանի նկատմամբ խափանման միջոց է ընտրվել չհեռանալու մասին ստորագրությունը՝ նա առնվազն 4 անգամ ինքնակամ ներկայացել է վարույթն իրականացնող մարմին և որևէ անգամ փորձ չի արել թաքնվելու կամ խոչընդոտելու գործի քննությանը:

«Քննիչի կողմից նրան կալանավորելու միջնորդություն ներկայացնելու օրը ևս ինքնակամ ներկայացել է, կալանքի միջնորդությունը քննվելուց հետո, դատարանը հեռացել է խորհրդակցական սենյակ, իսկ երբ վերադարձել է՝ Հայկ Սարգսյանը կրկին ներկայացել է դատարան և նրան անմիջապես կալանավորել են: Այսպիսով, նրա գործողությունները հակառակն են փաստում և որևէ փախուստի փորձ չի եղել», - նշում է պաշտպանը

Երեմ Սարգսյանն ընդգծում է նաև, որ հիշյալ գործով ակնհայտ ապօրինություններ են կատարվել, կոպտորեն խախտվել են իր պաշտպանյալի իրավունքները և իր միակ պահանջն այն է, որ այն ինչ տեղի է ունենում, օրինականության դաշտում տեղի ունենա:

Հիշեցնենք, որ 10-ը տարի առաջ տեղի ունեցած դեպքով ընդամենը օրեր առաջ 1984 թվականին ծնված Դավիթ Սիմոնյանը հայտարարել է, թե իրեն հրազենային վնասվածք պատճառած անձը Հայկ Սարգսյանն է:

2007 թվականի ապրիլի 1-ին Դավիթ Սիմոնյանը հրազենային վնասվածքով տեղափոխվել է թիվ 3 կլինիկական հիվանդանոց: Նույն օրը ոստիկանության Կենտրոնական բաժին էր ներկայացել քաղաքացի Ա.Ղևոնդյանը, ներկայացրել ատրճանակ և հայտնել, թե այն գտել է իրենց շենքին կից մանկապարտեզից դեպի նկուղ տանող աստիճանների մոտ, որի հետ անզգույշ վարվելու հետևանքով կրակել է՝ մարմնական վնասվածք պատճառելով ընկերոջը՝ Դավիթ Սիմոնյանին:

Սակայն 2007 թվականի մայիսի 28-ին ոստիկանության Կենտրոնականի քննչական բաժնում որոշում էր կայացվել փաստի առթիվ հարուցված քրեական գործի վարույթը կարճելու և Ա.Ղևոնդյանի նկատմամբ քրեական հետապնդում չիրականացնել` կողմերի հաշտության և բողոքի բացակայության հիմքով:

Տարիներ անց՝ 2018 թվականի հուլիսի 3-ին նոր երևան եկած հանգամանքներով պայմանավորված՝ Գլխավոր դատախազի կողմից վերացվել է նշված որոշումը, և քրեական գործը ուղարկվել ՀՀ քննչական կոմիտե` նախաքննություն կատարելու նպատակով։

Քննչական կոմիտեն էլ տեղեկացրել էր, որ կատարված նախաքննությամբ փաստական տվյալներ են ձեռք բերվել առ այն, որ Դավիթ Սիմոնյանն իրականում հրազենային վնասվածքն ստացել է Հայկ Ալեքսանդրի Սարգսյանի բնակության վայրի՝ Երևան քաղաքի Թումանյան փողոցի թիվ 11 շենքի բնակարանի նկուղային հարկում գտնվող սենյակում՝ 2007 թվականի ապրիլի 1-ին՝ ժամը 16:00-ի սահմաններում՝ վերջինիս կողմից արձակված կրակոցի հետևանքով։ Պարզվել է վիճաբանության շարժառիթը, միջադեպին ականատես անձի ինքնությունը։

Հայկ Սարգսյանին մեղադրանք է առաջադրվել՝ սպանության փորձի և ապօրինի կերպով հրազեն ձեռք բերելու և պահելու համար՝ ՀՀ քրեական օրենսգրքի 34-104-րդ հոդվածի 1-ին և 235-րդ հոդվածի 1-ին մասերով և երեկ նա կալանավորվել է:

Աղբյուր` Փաստինֆո