Փաստ ինֆո

ՀՀ երկրորդ նախագահ Ռոբերտ Քոչարյանը պատրաստ է ներկայանալ Հատուկ քննչական ծառայություն՝ հարցաքննության, և նա որևէ մտավախություն չունի: Այդ մասին լրագրողների հետ զրույցում ասաց Ռոբերտ քոչարյանի գրասենյակի ղեկավար Վիկտոր Սողոմոնյանը հավելելով, որ նախորդ շաբաթա վերջին իրենք ստացել են Հատուկ քննչական ծառայության ծանուցագիրը՝ որով Քոչարյանը հրավիրվել է հարցաքննության՝ որպես վկա։

Ըստ Վիկտոր Սողոմոնյանի՝ Ռոբերտ Քոչարյանը Հայաստանում չէ և վերադառնալու է հուլիսի 25-ին, ինչից հետո պատրաստ է մասնակցել հարցաքննության։

Հարցին, թե Ռոբերտ Քոչարյանը մտավախություն չունի՞, որ կարող է վկայի կարգավիճակից դառնալ կասկածյալ, կամ մեղադրյալ` Սողոմոնյանը պատասխանել է, որ Քոչարյանը որևէ մտավախություն չունի՝ «Մարտի 1»-ի հետ կապված։

Հիշեցնենք, որ ՀՔԾ պետ Սասուն Խաչատրյանը օրեր առաջ լրագրողների հետ ճեպազրույցում նշել է, որ Ռոբերտ Քոչարյանը «Մարտի 1»-ի գործով հրավիրվել է հարցաքննության`վկայի կարգավիճակով:

Պատասխանելով լրագրողի այն հարցին, թե կան ձայնագրություններ, որտեղ  պաշտպանության նախկին նախարար Միքայել Հարությունյանն ասում է, որ գործել է գերագույն գլխավոր հրամանատարի՝ Ռ. Քոչարյանի ցուցումով, Վիկտոր Սողոմոնյանն ասաց՝ «Եկեք դատենք միասին, փորձենք հասկանալ: Ստացվում է, որ սահմանադրական կարգ է եղել, որի կրողը եղել է հաղթած ընդդիմությունը, որը չի հաստատվում ո՛չ ԿԸՀ, ո՛չ ՍԴ որոշումով: Պաշտպանության նախարարությունն էլ այդ կարգը տապալել է: Սա ծաղր է օրենքի նկատմամբ»: 

Ինչ վերաբերում է զինված ուժերը ներքաղաքական խնդիրների մեջ ներքաշելուն， ապա Վիկտոր Սողոմոնյանն ասաց, որ Սահմանադրության մեջ տեսնում են այն, ինչ ուզում են տեսնել:

«Ուշադրությամբ կարդացեք գերագույն գլխավոր հրամանատարի լիազորությունները, նրա հրամանագիրը, ուշադիր կարդացեք պաշտպանության նախարարի հրամանը՝ 0038-ը, եւ եզրակացություններ կանեք առանց ինձ: Պարզվելու է, որ դա բավական պարզ խնդիր է:

Բոլորը թվարկում են, բայց մեկ-երկու բառ միտումնավոր բաց են թողնում այն բառերը, Սահմանադրության այն դրույթները, որոնք օրինականություն են հաղորդում Ռոբերտ Քոչարյանի գործողություններին: Ակնհայտ փաստեր անտեսված են: Հարմարեցում է տեղի ունեցել այն քաղաքական նպատակներին, որոնք հետապնդել է փաստահավաք խումբը»,- ասաց Վիկտոր Սողոմոնյանը: 

Սողոմոնյանը նաեւ հավելեց, որ փաստահավաք խմբի անդամ Սեդա Սաֆարյանը «Տեսակետների խաչմերուկ» հաղորդման ժամանակ բացեիբաց հայտարարել է, որ իրենց ցույց են տվել դեպի Ռոբերտ Քոչարյան տանող ճանապարհը: «Եթե դուք սա համարում եք օբյեկտիվ, ապաքաղաքական, ուրեմն տարբեր կերպ ենք ընկալում քաղաքականությունը»,- նշեց նա: 

Դիտարկմանը, թե ամեն դեպքում արտակարգ դրության ժամանակ չի թույլատրվում զինված ուժերը ներգրավել քաղաքական գործընթացներին, Վիկտոր Սողոմոնյանը հարցով արձագանքեց. «Դուք այդ մասին որտե՞ղ եք կարդացել, դուք կարդացել եք հատվածական մոտեցումներ: Երբ ամբողջությամբ կկարդաք, մենք միասին կվերլուծենք: 

Հորդորում եմ ուշադիր կարդալ 2005թ.-ի Սահմանադրությունը, թե նախագահն ինչ լիազորություններ ունի, երբ է հայտարարում արտակարգ իրավիճակ, ինչին են ծառայում Զինված ուժերը ՀՀ-ում: Այդ ժամանակ կտեսնեք, որ Ռոբերտ Քոչարյանի գործողությունները եղել են բացարձակ հիմնավորված: Ինչ վերաբերում է հրամանին, այն ՊՆ ներքին հրաման է, եւ Սահմանադրությունը չի ասում, որ հրամանը պետք է համաձայնեցվեր Ռոբերտ Քոչարյանի հետ»: 

Աղբյուր` Փաստինֆո