Փաստ ինֆո

Ազգային Օլիմպիական կոմիտեի նախագահ Գագիկ Ծառուկյանի օգնական Էդուարդ Բաբայանին նախօրեին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով և որպես խափանման միջոց է ընտրվել կալանավորումը:

«Փաստինֆո»-ն Էդուարդ Բաբայանի պաշտպան Յուրիկ Խաչատրյանից տեղեկացավ, որ Երևան քաղաքի ընդհանուր իրավասության դատարանը բավարարել է նախաքննական մարմնի միջնորդությունը Բաբայանին կալանավորելու վերաբերյալ, միևնույն ժամանակ դատարանը մերժել է Բաբայանին գրավով ազատ արձակելու վերաբերյալ միջնորդությունը:

Պաշտպանը նշում է, որ ընդամենը մեկ անձի ցուցմունքի հիման վրա իր պաշտպանյալի նկատմամբ մեղադրանք է կառուցվել, այն դեպքում, երբ ինչպես տուժողը, այնպես էլ վերջինս կինը լրատվամիջոցներում պնդել են, որ Բաբայանը չի հարվածել, և որ վնասվածնքերն ստացել է ընկնելու հետևանքով:

Ինչ վերաբերում է տեսանյութին, որտեղ տուժողը ներկայացնում է, որ վնասվածքներն ստացել է հարվածների հետևանքով մեր հարցին ի պատասխան, պաշտպանը նշեց, որ նա իրականությանը չհամապատասխանող հայտարարություն է կատարել, որի վերաբերյալ հետագայում հայտնել է, որ զայրացած է եղել, և դա է պատճառ հանդիսացել:

Միևնույն ժամանակ պաշտպանը նշեց, որ քննիչը փորձագետին հարց է ուղղել, թե հնարավո՞ր է այդ վնասվածքները բութ, կոշտ առարկայի միջոցով նրան պատճառված լիներ, փորձագետը պատասխանել է, որ վնասվածքների մի մասը՝ այո:

Հարցին, թե վնասվածքների մյուս մասի վերաբերյալ փորձագետը ի՞նչ է պատասխանել, պաշտպանը նշեց, որ քննիչը հարց չի ուղղել, եթե ուղղեր, ապա այդ հարցին ևս փորձագետի պատասխանը նույնն էր լինելու:

Արդյո՞ք դեպքի վայրում տեսանկարահանող սարքեր չեն եղել, պաշտպանը պատասխանեց՝ կրիչներ չեն հայտնաբերվել:

Այն պայմաններում, երբ Բաբայանն ինքնակամ է ներկայացել վարույթն իրականացնող մարմին, քննիչը միջնորդում է նրան կալանավորել՝ պատճառաբանելով, որ կխոչընդոտի քննությանը, նշում է պաշտպանը՝ հավելելով՝ ինչի՞ն կարող է խոչընդոտել, եթե տվյալ տարածքի տեսանյութերի կրիչները չեն հայտնաբերվել, որում կերևա, թե ինչպես է տուժողը վնասվածքներ ստացել, բացի այդ, տուժողը հերքում է, որ իր վնասվածքները հարվածի հետևանքով են իրեն պատճառվել, նման պայմաններում ինչի՞ն պետք է խոչընդոտի կամ ինքնակամ ներկայանալու պարագայում ինչո՞ւ պետք է խուսափի քննությունից:

Պաշտպանը նաև նշեց, որ քննիչը մերժել է տուժողի և իր պաշտպանյալի միջև առերես քննչական գործողություն կատարելու վերաբերյալ իրենց ներկայացրած միջնորդությունը:

Այս միջնորդությունը պաշտպանական կողմը պատրաստվում է կրկին ներկայացնել, ինչպես նաև բողոքարկելու են կալանավորման վերաբերյալ առաջին ատյանի դատարանի որոշումը:

Նշենք, որ Էդուարդ Բաբայանի նախկին պաշտպան Գևորգ Դավթյանը Բաբայանին ձերբակալելուց հետո որոշումը բողոքարկել էր, սակայն դատարանը այն մերժել է:

Նշենք նաև, որ Էդուարդ Բաբայանն իրեն առաջադրված մեղադրանքը չի ընդունում:

Աղբյուր` Փաստինֆո