Փաստ ինֆո

ՀՀ արդարադատության նախկին նախարար Դավիթ Հարությունյանն իրավական տեսանկյունից գնահատման ենթակա չի համարում հուլիսի 3-ին Հատուկ քննչական ծառայության՝ 2008-ի մարտի 1-ի դեպքերի մասին հաղորդագրությունում ընտրախախտումների վերաբերյալ ձևակերպումները: «Արմենպրես»-ի հաղորդմամբ՝ Ազգային ժողովում ընտրական փոփոխությունների հերթական քննարկման ընթացքում Հարությունյանը նման կարծիք հայտնեց լրագրողների հետ ճեպազրույցում:

Հուլիսի 3-ին Հատուկ քննչական ծառայությունը հաղորդագրություն էր տարածել, որում նաև նշվում էր.

«Այսպես, պարզվել է, որ 2008 թվականի փետրվարի 19-ին անցկացված՝ Հայաստանի Հանրապետության նախագահի ընտրության նախապատրաստման և անցկացման ընթացքում տեղի են ունեցել այնպիսի ընտրախախտումներ, որոնք, ըստ հասարակության լայն շերտերի, խախտել են այդ ժամանակ գործող ՀՀ Սահմանադրության 4-րդ հոդվածում ամրագրված` ընտրական իրավունքի հիմնական սկզբունքները, որի արդյունքում ժողովուրդը զրկվել է ազատ ընտրությունների միջոցով իր իշխանությունն իրականացնելու հնարավորությունից:

Ընտրությունների ընթացքում կատարված մեծածավալ խախտումները, որոնք հասարակական կազմակերպությունների, տարբեր իրավապաշտպան կառույցների և քաղաքացիների կողմից վերագրվել են Հանրապետության գործող նախագահ Ռոբերտ Քոչարյանի և գործող վարչապետ՝ նախագահի թեկնածու Սերժ Սարգսյանի կողմնակիցներին, առաջացրել են հանրության մեծ մասի զայրույթը և 2008 թվականի փետրվարի 20-ից սկսած Երևանի Ազատության հրապարակում կազմակերպվել են նախագահի մյուս թեկնածուներին սատարող բազմահազար քաղաքացիների զանգվածային հրապարակային խաղաղ միջոցառումներ, երթեր, շուրջօրյա հանրահավաքներ»:

«Նմանատիպ վեճերը լուծվում էին Սահմանադրական դատարանում: Իսկ ՍԴ-ի ակտերը վերջնական են ընդունման պահից: Վստահեցնում եմ՝ չեք գտնի որևէ ժողովրդավարական երկիր, որտեղ լինի մի կառույց՝ ԱԺ, գործադիր իշխանություն, դատախազություն, որոնք վիճարկեն ՍԴ-ի ընդունած դատական ակտերը»,-ասաց Հարությունյանն՝ ի պատասխան  լրագրողի՝ ՀՔԾ հաղորդագրությունից մեջբերմանը. Հարությունյանը նաև հավելեց, որ ծանոթ չէ դիտարկմանը: Միաժամանակ նա փաստեց՝ եթե այն պաշտոնական է,ապա վիճարկել ՍԴ-ի ակտը ոչ ոք իրեն թույլ չէր տա:

Լրագրողն ընթերցեց ՀՔԾ հաղորդագրության այդ հատվածն ամբողջությամբ, ինչին ի պատասխան Հարությունյանը նշեց. «Ձևակերպումների զգալի մասը իրավական տեսանկյունից գնահատման ենթակա չեն»:

Աղբյուր` Փաստինֆո