Փաստ ինֆո

Փաստաբան Նորայր Նորիկյանը պնդում է՝ Միքայել Հարությունյանին առաջադրված մեղադրանքը պետք է փոփոխվի, նրան պետք է մեղադրանք առաջադրվի ՀՀ քրեական օրենսգրքի 300-րդ հոդվածի հատկանիշներով: 

Փաստաբանը իր ֆեյսբուքյան էջում գրառում է կատարել անդարադառնալ նախօրեին իր գրառման՝ Միքայել Հարությունյանին սխալ մեղադրանք առաջադրելուն ինչպես նաև ՀՔԾ պետ Սասուն Խաչատրյանի հայտարարությանը:

Փաստաբանի գրառումը ներկայացնում ենք ամբողջությամբ.

Իմ կողմից երեկ հրապարակված իրավական պարզաբանումն այն մասին, որ Հատուկ քննչական ծառայությունը սխալ մեղադրանք է առաջադրել ՀՀ Պաշտպանության նախկին նախարար Միքայել Հարությունյանին, արժանացավ տարատեսակ արձագանքների:

Այսօր Հատուկ քննչական ծառայության պետը, պատասխանելով www.iravaban.net կայքի լրագրողի հարցին, տառացիորեն հայտարարել է, թե «Այն մեկնաբանությունները, որոնք տալիս են որոշ իրավաբաններ, թե գործը հարուցվել է մի հոդվածով, որը գոյություն չի ունեցել, մեղմ ասած, ոչ կոմպետենտ մեկնաբանություններ են, որովհետև այդ արարքը՝ սահմանադրության տապալումը, գոյություն է ունեցել նաև 2008 թվականին, պարզապես այն նախատեսված է եղել մեկ այլ հոդվածով»,- ասաց նա։

Ըստ նույն հոդվածի, Սասուն Խաչատրյանը, ցույց տալով նախորդիվ գործող ՀՀ քրեական օրենսգրքի 300-րդ հոդվածը, որում որպես հանցակազմը բնորոշող հանգամանք, դիսպոզիցիան սահմանվել է նաև ՀՀ սահմանադրական կարգը բռնությամբ տապալելուն ուղղված գործողությունը, նշել է, որ այս գործողությունը այն ժամանակ նախատեսված է եղել, որպես հանցագործություն։ Ընդամենը նախատեսված է եղել 300 հոդվածով, հետագայում այս հոդվածի դիսպոզիցիայից այս գործողությունը հանվել և նախատեսվել է 301.1 հոդվածով։ Ընդամենը փոխվել է հոդվածի համարը:

Մեկ անգամ ևս ուսումնասիրելով խնդիրը՝ կրկին անգամ համոզվեցի, որ առաջադրված մեղադրանքը պետք է փոխվի, քանի որ ՍԽԱԼ է…

Կտրականապես համաձայն չեմ Հատուկ քննչական ծառայության պետի դիտարկման հետ՝ հետևյալ պատճառաբանությամբ.

Հիշատակված օրենքի ընդունման ժամանակ գործող «Իրավական ակտերի մասին» ՀՀ օրենքի 70-րդ հոդվածի 3-րդ կետի համաձայն՝ Իրավական ակտում լրացումներ կատարվում են դրանում ՆՈՐ բաժիններ, գլուխներ, ՀՈԴՎԱԾՆԵՐ, մասեր, կետեր, պարբերություններ, նախադասություններ, բառեր կամ թվեր լրացնելու միջոցով:

Գործող «Նորմատիվ իրավական ակտերի մասին» ՀՀ օրենքի 33-րդ հոդվածի 3-րդ կետի համաձայն՝ Նորմատիվ իրավական ակտում լրացումներ կատարվում են դրանում ՆՈՐ բաժիններ, գլուխներ, ՀՈԴՎԱԾՆԵՐ, մասեր, կետեր, ենթակետեր, պարբերություններ, նախադասություններ, բառեր, թվեր կամ կետադրական նշաններ լրացնելու միջոցով:

Վերը նշված իրավանորմերի վերլուծությունից բխում է, որ ցանկացած օրենքում որևէ լրացում կատարվում է միայն այն դեպքում, երբ անհրաժեշտ է ՆՈՐ հոդված ավելացնել, հետևաբար՝ այս համատեքստում ՀՔԾ պետի այն դիտարկումը, թե ընդամենը փոխվել է հոդվածի համարը, չի դիմանում որևէ քննադատության:

Ինչ վերաբերում է ՀՔԾ պետի այն դիտարկմանը, թե Մ. Հարությունյանին մեղսագրվող գործողությունն այն ժամանակ նախատեսված է եղել, որպես հանցագործություն՝ 300-րդ հոդվածով, սակայն հետագայում հոդվածի դիսպոզիցիայից այս գործողությունը հանվել և նախատեսվել 301.1 հոդվածով, նույնպես չի դիմանում որևէ քննադատության այն պարզ պատճառով, որ ՀՀ քրեական օրենսգրքի 300-րդ հոդվածը փոփոխության է ենթարկվել նույն օրը՝ 18.03.2009թ. նույն օրենքով, որ օրենքով որ լրացում է կատարվել ՀՀ քրեական օրենսգրքում և ավելացել է 300.1 հոդվածը:

Եթե 300-րդ հոդվածով նախատեսված է եղել, ապա ո՞րն է եղել տրամաբանությունը՝ տարանջատելու և լրացման միջոցով որպես առանձին հանցագործության տեսակ ներդնելու: Թող միանգամից 300-րդ հոդվածի շրջանակներում կատարեին համապատասխան փոփոխություններ…

Իմ կարծիքով, Մ. Հարությունյանին առաջադրված մեղադրանքը պետք է փոփոխվի և նրան պետք է մեղադրանք առաջադրվի ՀՀ քրեական օրենսգրքի 300-րդ հոդվածի հատկանիշներով:

Հ.Գ. ԻՆքս ողջունում եմ ՀՔԾ գործունեությունը Մարտի 1-ի գործով իրականացվող ջանքերի առումով՝ հույս տածելով, որ կիրականացվի օբյեկտիվ, բազմակողմանի ու լրիվ քննություն՝ ճշմարտությունը բացահայտելու և բոլոր մեղավորներին պատասխանատվության ենթարկելու համար:

Միաժամանակ գտնում եմ, որ որևէ վրիպում ու բացթողում այս գործում ուղղակի անթույլատրելի է:

Պնդում եմ, որ Մ. Հարությունյանին առաջադրված մեղադրանքը պետք է փոխվի և համապատասխանեցվի արարքի պահին գործող ՀՀ օրենսդրությանը:

Աղբյուր` Փաստինֆո