Փաստ ինֆո

ՀՀ պաշտպանության նախկին նախարար Միքայել Հարությունյանին ՀՀ քրեական օրենսգրքի 300.1-ին հոդվածի 1-ին մասով մեղադրանք առաջադրելը հակասում է ՀՀ Սահմանադրությանը։ Այսօր նման հայտարարությամբ է հանդես եկել ՀՀ արդարադատության նախկին նախարար Դավիթ Հարությունյանը՝ պատասխանելով Aravot.am-ի հարցին， թե արդյոք խնդիր չի տեսնում， որ ՀՔԾ-ն Մարտի 1-ի գործով պաշտպանության նախկին նախարար Միքայել Հարությունյանին մեղադրանք էր առաջադրել Քրեական օրենսգրքի 300.1-ին հոդվածի 1-ին մասով, այն բանի համար, որ նա այլ անձանց հետ նախնական համաձայնությամբ տապալել է սահմանադրական կարգը` այն դեպքում, երբ տվյալ հոդվածը 2008-ին չի եղել, լրացվել է 2009-ին:

«Ոչ թե ես եմ խնդիր տեսնում, Սահմանադրությունն է տեսնում խնդիր: Ընդամենը անհրաժեշտ է ընթերցել Սահմանադրության 72-րդ հոդվածը: Ես հասկանում եմ, որ իշխանությունների համար շատ կարեւոր է ամենօրյա պահել լարվածությունը, բայց դա չի կարելի անել այս գնով: Ես կարծում եմ, որ սա շատ լուրջ հարված էր թե՛ այլ բացահայտումներին, թե՛ ընդհանրապես նպատակին: Այս շտապողականությունը, որի արդյունքում խախտվում է Սահմանադրությունը, ներողություն, դա անթույլատրելի է: Ես ցավով եմ դա նշում եւ հույս ունեմ, որ այսօր մեր իրավապահ մարմինները, առաջին հերթին խոսքս ուղղում եմ հենց իրենց, ավելի աչալուրջ կվերաբերվեն իրենց կատարած աշխատանքին, որովհետեւ նմանատիպ սխալներով նրանք արժեզրկում են մյուս աշխատանքները»，- ասել է Դ.Հարութունյանը: Դիտարկմանը, որ ՀՔԾ պետը պարզաբանել է, թե նախկինում 300 հոդվածն է եղել, որի նկարագրությունը նույնն է եղել՝ Դավիթ Հարությունյան արձագանքեց. «Համադրեք ինքներդ եւ կտեսնեք»:

Աղբյուր` Փաստինֆո