Փաստ ինֆո

2008թ. մարտի 1-ի գործով Հայաստանի երկրորդ նախագահ Ռոբերտ Քոչարյանը Հատուկ քննչական ծառայություն է հրավիրվել վկայի կարգավիճակով: Այդ մասին այսօր կառավարության նիստից առաջ լրագրողների հետ ճեպազրույցում ասաց Հատուկ քննչական ծառայության պետ Սասուն Խաչատրյանը:

Նույն գործի շրջանակներում վկայի կարգավիճակում հարցաքննության է հրավիրվել նաև Պաշտպանության նախկին նախարար Սեյրան Օհանյանը:

Նշենք, որ նախօրեին հայտնի դարձավ, որ Սեյրան Օհանյանն արդեն հարցաքննվել է, ինչ վերաբերում է Ռոբերտ Քոչարյանին ուղարկված ծանուցագրին, ապա Քոչարյանի գրասենյակի ղեկավար Վիկտոր Սողոմոնյանը երեկ լրատվամիջոցներին հայտնել էր, որ իրենց ծանուցագիր չեն ստացել, բացի այդ նա նաև նշել է, որ Ռոբերտ Քոչարյանը Հայաստանում չէ:

Այլ բարձրաստիճան պաշտոնյաներ հիշյալ գործի շրջանակներում կհրավիրվեն ՀՔԾ հարցաքննության, թե ոչ, Սասուն Խաչատրյանը պատասխանեց՝ ովքեր կարող են որևէ տվյալ հայտնել մարտի 1-ի գործի հետ կապված, հրավիրվելու են և որևէ կաշկանդվածություն, զբաղեցրած պաշտոնների և անունների հետ կապված չկա:

Ինչ վերաբերում է նրան, թե ՀՔԾ սխալ է քրեական գործ հարուցել և 2008թ. մարտի 1-ին ՀՀ քրեական օրենսգրքում գոյություն չի ունեցել 300.1 հոդված՝ նախօրեին իրավաբանների հնչեցրած կարծիքներին, ապա ՀՔԾ պետն ասաց «այն մեկնաբանությունները որոնք տալիս են որոշ իրավաբաններ, անուններ չեմ ցանկանում տալ, թե հարուցվել է մի հոդվածով, որը գոյություն չի ունեցել, դա մեղմ ասած ոչ կոմպետենտ մեկնաբանություններ են, որովհետև այդ արարքը՝ սահմանադրական կարգի տապալումը քրեորեն հետապնդելի է եղել նաև 2008թ. պարզապես այն նախատեսված է եղել այլ հոդվածով՝ հոդված 300 պետական իշխանությունը յուրացնելը»,- ասաց Սասուն Խաչատրյանը հավելելով՝ այս գործողությունը այն ժամանակ նախատեսված է եղել 300-րդ հոդվածով հետագայում այդ հոդվածի դիսպոզիցիայից այդ գործողությունը հանվել է և առանձին հոդվածով է նախատեսվել՝ 301.1-րդ հոդվածով:

Աղբյուր` Փաստինֆո