Փաստ ինֆո

ՀՀ վարչապետ Նիկոլ Փաշինյանը անհասկանալի է համարում «Սասնա ծռեր» խմբի հետ ընտրություններում ընթացքում հնարավոր համագործակցության վերաբերյալ հարցադրումները։

«Սասնա ծռեր» քաղաքական կազմակերպության մասին ինձ հայտնի չէ, եթե նկատի ունեք «Սասնա ծռեր» խմբի գործունեությունը, ինչպես տեղյակ եք՝ նրանց գործով դատավարություն է ընթանում և անհասկանալի է ինձ հարցնել, թե արդյոք ես նրանց հետ կգնամ համագործակցության»,- հուլիսի 1-ին հայտարարել է վարչապետ Նիկոլ Փաշինյանը՝ արձագանքելով Ժիրայր Սեֆիլյանի եւ «Սասնա Ծռերի»-ի հետ հնարավոր համագործակցության վերաբերյալ լրագրողի հարցադրմանը։

Հիշեցնենք, որ հունիսի 30-ին «Հիմնադիր խորհրդարանի» առաջնորդ Ժիրայր Սեֆիլյանը հայտարարել է, թե ոստիկանության ՊՊԾ գունդը գրավելու մեջ մեղադրվող «Սասնա ծռեր» զինված խմբի հետ պատրաստվում են գալիք ընտրություններին։ «Հիմնադիր խորհրդարանն» ու «Սասնա ծռերն» այսօրվանից պատրաստվում են սպասվող «ազատ, արդար և թափանցիկ» ընտրություններին»,- հայտարարել է Ժիրայր Սեֆիլյանը։

Ընդ որում՝ վերջինս չէր բացառել Նիկոլ Փաշինյանի կուսակցությանը` «Քաղաքացիական պայմանագրին» սատարելը։ «Բոլոր տարբերակներն էլ պիտի դիտարկել: Ինչ վերաբերում է գործող իշխանություններին, մենք նոր չէ, որ հայտարարում ենք, բանտից էլ հայտարարել ենք, որ աջակցել ենք շարժմանը: Վարչապետի ընտրությունից հետո շնորհավորել ենք, ողջունել ենք և նեցուկ ենք կանգնել: Այսօր էլ շարունակվում է նույն քաղաքականությունը»,- ասել է Սեֆիլյանը:

Իսկ վարչապետ Նիկոլ Փաշինյանը նախօրեին ընդգծել է, որ առայժմ չի որոշվել թե «Քաղաքացիական պայմանագիր» կուսակցությունը ի՞նչ ձևաչափով կմասնակցի խորհրդարանական ընտրություններին։ Ըստ նրա հիմա քննարկումներ են գնում, որոշում դեռևս չկա: Առայժմ քննարկումները «Ելք» դաշինքի շրջանակներում են»:

Ինչ վերաբերում է ժամկետներին, ապա վարչապետի խոսքերով՝ մոտավորապես ժամկետը արդեն նշվել է՝ 1 տարվա ընթացքում այն օրվանից, երբ ասվել է， բայց նաեւ ավելացրել， որ կոնկրետ ժամկետը, իհարկե, կախված է նաև քաղաքական իրավիճակից և որոշակի տեխնիկական հարցերից։

Աղբյուր` Փաստինֆո