Փաստ ինֆո

Հայաստանի և Գերմանիայի արտաքին գործերի նախարարներ Զոհրաբ Մնացականյանը և Հայկո Մաասը քննարկել են երկկողմ բարձրաստիճան պաշտոնյաների այս տարի նախատեսված փոխայցելությունների ժամանակացույցը: Այդ մասին Մաասի հետ համատեղ ասուլիսում ասաց ՀՀ ԱԳ նախարարը:

«Մենք շատ ընդարձակ քննարկեցինք հայ-գերմանական երկխոսությունը, արձանագրեցինք, որ վերջին տարիներին երկկողմ կապերը դինամիկ կերպով զարգանում են: Ուրախ եմ, որ մեր հարաբերությունների զարգացման ուղղությամբ առկա է երկուստեք հետաքրքրություն և պատրաստակամություն: Այս համատեքստում քննարկեցինք այս տարի նախատեսված բարձրաստիճան փոխայցելությունների ժամանակացույցը: Մեր ուշադրության կենտրոնում են քաղաքական, առևտրատնտեսական հարաբերությունները, փոխգործակցությանն առնչվող հարցերը»,-  ասաց Զոհրաբ Մնացականյանը:

Նրա խոսքով՝ այս բնագավառում Գերմանիան Հայաստանի խոշորագույն գործընկերներից է և ակտիվորեն ներկայացված է մեր երկրի տնտեսության մեջ: «Արժանահիշատակ է, որ Գերմանիան Հայաստանի տնտեսության իրական հատվածում զբաղեցնում է երկրորդ տեղը՝ զիջելով միայն Ռուսաստանին: Մեր երկկողմ օրակարգում կարևոր տեղ է զբաղեցնում նաև ֆինանսական համագործակցությունը, մենք արժևորում ենք GIZ-ի և KFW-ի գործունեությունը մեր երկրում: Երախտապարտ ենք Գերմանիայի ժողովրդին անկախությունից ի վեր Հայաստանին ցուցաբերվող բազմաբնույթ օժանդակության համար»,- նշեց ՀՀ ԱԳ նախարարը:

Զոհրաբ Մնացականյանը կարևորել է նաև զբոսաշրջության ոլորտում համագործակցության զարգացումը: Ըստ նրա, 2018 թվականի հունվար-մարտ ամիսներին Գերմանիայից Հայաստան այցելությունների քանակն անցյալ տարվա նույն ժամանակահատվածի համեմատ աճել է 47 տոկոսով: «Իսկ այս տարվա հունիսի 17-ից մենք  գործարկել ենք Բեռլին-Երևան ուղիղ չվերթը, ինչն անկասկած կնպաստի զբոսաշրջության աճին»,- նկատեց ՀՀ ԱԳ նախարարը:

Աղբյուր` Փաստինֆո