Փաստ ինֆո

Ազգային ժողովի նախկին պատգամավոր Առաքել Մովսիսյանը (Շմայս) կոչ է անում չհապաղել՝ անօրինական բոլոր զենքերը հանձնել իրավապահներին:

Վերջին մեկ շաբաթվա ընթացքում նախկին պատգամավորը երկրորդ անգամ է ԱԱԾ-ում գտնվել, իր իսկ խոսքով՝ այս անգամ ինքնակամ է ներկայացել՝ հիշել է, որ տանը զենք ունի «Շմայսեր» տեսակի և որոշել է ինքնակամ հանձնել:

«Իմ պատմական «Շմայսեր» անունով ավտոմատը, նաև մի քանի փամփուշտ, հիշեցի, որ պահած էր, ասեցի՝ թող չմնա, փչանա»,- «Ազատության» եթերում ասել է նախկին պատգամավորը:
Նշենք նաև, որ Առաքել Մովսիսյանը հուլիսի 21-ին ձերբակալվել էր ԱԱԾ-ի կողմից, ձերբակալման հաջորդ օրը նա ազատ արձակվեց և հայտարարեց՝ «ԱԱԾ-ն շատ շնորհքով է ներխուժել իր բնակարան, օրենքի տառին համապատասխան ստուգումներ են իրականացրել»:

Ազգային անվտանգության ծառայությունն էլ պաշտանակն հաղորդագրությամբ հանդես եկավ հայտնելով, որ օպերատիվ-հետախուզական միջոցառումների արդյունքում տվյալներ էին ստացվել, որ Առաքել Մովսիսյանն իրեն պատկանող տարածքներում ապօրինի կերպով պահում է զենք և ռազմամթերք:

Փաստի առթիվ հարուցվել է քրեական գործ՝ ՀՀ քրեական օրենսգրքի 235-րդ հոդվածի 2-րդ մասի հատկանիշներով (մի խումբ անձանց կողմից նախնական համաձայնությամբ հրազեն ու ռազմամթերք ապօրինի կերպով ձեռք բերելը, փոխադրելը և պահելը):

Եվ հիշյալ քրեական գործի շրջանակներում հունիսի 21-ին խուզարկություններ են իրականացվել Առաքել Մովսիսյանի տանը, ինչպես նաև զենք-ռազմամթերք տեղափոխելու և պահելու հնարավոր վայրերում: Խուզարկությամբ հայտնաբերվել է ենթադրաբար օրինական զենք և ռազմամթերք՝ գրանցման փաստաթղթերով:

Նույն օրը՝ ժամը 23:00-ի սահմաններում, Առաքել Մովսիսյանն Այգեկ գյուղի ամայի տարածքում գտնվող երկու տարբեր թաքստոցներից՝ հողածածկույթի տակից հանել ու կամովի հանձնել է զենքն ու ռազմամթերքը, մասնավորապես՝ «ԱԿՄ» տեսակի 2 ինքնաձիգ, որից մեկը՝ փողատակային նռնականետով, «ՌՊԿ» տեսակի մեկ գնդացիր, «Բելկա» տեսակի 1 համակցված հրացան, 3 որսորդական հրացան, տարբեր տրամաչափի թվով 162 փամփուշտներ:

Եվ հենց այս հիմքով, որ զենքն ու ռազմամթերքը կամովին է հանձնել Առաքել Մովսիսյանն ազատ է արձակվել:

Աղբյուր` Փաստինֆո