Փաստ ինֆո

«Փաստինֆո»-ի տեղեկություններով, դատարանը մերժել է պայմանագրային զինծառայող, շարքային Հովհաննես Մելքոնյանի մահվան գործով կապիտան Ս.Կարապետյանի նկատմամբ խափանման միջոց կալանավորումն ընտրելու վերաբերյալ միջնորդությունը:
Ալկոհոլի ազդեցության տակ հանցագործություն կատարած անձի նկատմամբ դատարանը որպես խափանման միջոց է կիրառել չհեռանալու մասին ստորագրությունը:
Նշենք, որ կապիտանին մեղադրանք է առաջադրվել` ՀՀ քրեական օրենսգրքի 371-րդ հոդվածի 2-րդ և 373-րդ հոդվածի 3-րդ մասերով:
Ավելի վաղ հայտնի դարձավ, որ զինծառայողը Հովհաննես Մելքոնյանը մահացու հրազենային վիրավորում է ստացել մարտական դիրքում՝ հունիսի 22-ի ուշ երեկոյան։
Դեպքի առթիվ հարուցված քրեական գործով ձեռնարկված միջոցառումների արդյունքում պարզվել է, որ զորամասի հրաձգային գումարտակի վաշտի հրամանատարի տեղակալ, կապիտան Ս.Կարապետյանը, ընդգրկված լինելով մարտական հերթապահության զորամասի պահպանության տեղամասի մարտական դիրքում՝ որպես հենակետի պատասխանատու, վատնել է ծառայողական օգտագործման համար դիրքի անձնակազմին տրամադրված, ռազմամթերք հանդիսացող փամփուշտները։
Հունիսի 22-ին՝ ժամը 18:00-ի սահմաններում, կապիտանը գտնվելով ոգելից խմիչքի ազդեցության տակ՝ դիրքի կացարանի զինաբուրգից վերցրել է ինքնաձիգ և դիրքի խոհանոցի հարակից տարածքում առանց որևէ հիմնավոր պատճառի կրակոցներ արձակել օդ, նույնը կրկնվել է նաև ժամեր անց՝ ժամը 21:00-ի սահմաններում:
Դրանից հետո` ժամը 22:50-ի սահմաններում, կապիտանը կրկին զինաբուրգից վերցրել է նույն դիրքում մարտական հերթապահություն իրականացնող պայմանագրային զինծառայող, եֆրեյտոր Հ.Դարբինյանին ամրակցված ինքնաձիգը և խոհանոցի հարակից տարածքում լիցքավորելով այն` արձակել անկանոն կրակոցներ, ինչի հետևանքով մահացու հրազենային վիրավորում է ստացել իրենից մի քանի մետր հեռավորության վրա գտնվող, մարտական դիրքում հերթապահություն իրականացնող, պայմանագրային զինծառայող, շարքային Հովհաննես Գրիշայի Մելքոնյանը։

Աղբյուր` Փաստինֆո