Փաստ ինֆո

Վերջնական իրավական գնահատականը մանրամասն հետաքննություն անցկացնելուց հետո պետք է տա դատարանը, և որևէ մեկը իրավունք չունի այդ հարցը վիճարկելու:

Այս մասին «Արցախպրես»-ի թղթակցի հետ զրույցում ասել Արցախի հանրապետության նախագահի մամլո քարտուղար Դավիթ Բաբայանը՝ խոսելով ՀՀ ԱԺ պատգամավոր, Երկրապահ կամավորական վարչության նախագահ, «Արցախի հերոս»-ի կոչմանն արժանացած Մանվել Գրիգորյանի շուրջ ծավալված վերջին աղմկահարույց  դեպքից:
 
Նրա խոսքով՝ պետք է տեղի ունենա բաց և թափանցիկ դատավարություն, և գործընթացի մասին տեղյակ պիտի պահվի հասարակությանը:
 
Խոսելով Մանվել Գրիգորյանին շնորհված «Արցախի հերոս»-ի կոչումից զրկելու հարցի մասին՝ Դ. Բաբայանն ասել է, որ այդ հարցը շատ է մտահոգում հասարակությանը:
 
«Հասկանալի է` ինչ էմոցիաներ է տիրում հասարակության մեջ՝ զայրույթ, վրդովմունք, տարակուսանք, հիասթափություն: Բայց պետք է հարցին մոտենանք որպես իրավական և ժողովրդավարական պետություն:

Ամեն ինչ հասկանալի է, բայց այն պետք է լինի օրենքի սահմաններում: Մենք ժողովրդավարական, իրավական, քաղաքակիրթ պետություն ենք և Մանվել Գրիգորյանի դեպքում էլ պետք է գործենք օրենքի շրջանակներում:

Նույնիսկ ադրբեջանցի դիվերսանտներին, ահաբեկիչներին վնասազերծելիս էլ նրանց նկատմամբ ինքնադատաստան չի արվել: Լրատվամիջոցների, Մարդու իրավունքների պաշտպանների, միջազգային իրավապաշտպան կազմակերպությունների ներկայացուցիչների մասնակցությամբ նրանց դեպքում ևս տեղի է ունեցել բաց, թափանցիկ դատավարություն. նույն մոտեցումը պետք է ցուցաբերվի ցանկացած դատապարտյալի նկատմամբ»,- ավելացրել է Դ. Բաբայանը:

Աղբյուր` Փաստինֆո