Փաստ ինֆո

ԱԺ նախկին պատգամավոր, ԵԿՄ նախկին փոխնախագահ Մյասնիկ Մալխասյանը գտնում է, որ գուցեև գեներալ Մանվել Գրիգորյանը տեղյակ չի եղել իրեն սեփականության իրավունքով պատկանող տարածքներում սննդի մեծ քանակություն լինելու մասին:

«Բանաձև» հաղորդաշարի շրջանակներում Մալխասյանը հայտարարեց, թե ամոթալի ու ցավալի է այդ փաստը, սակայն հնարավոր է, որ «Գրիգորյանը չիմանար, իր նազիր վեզիրները բերած լցրած լինեն պահեստում, գազաններին կերակրեն: Ամեն ինչ չի, որ ինքը պետք է իմանար, որն էլ եղավ իր խայտառակության պատճառը»:

Ինչ վերաբերում է զենքին, ապա, ըստ նրա, ոչ միայն ինքը, այլև բոլորը գիտեն և զարմանալի է, որ իրավապահ մարմինները հենց այսօր ձեռնամուխ եղան բացահայտելու, առանց իշխանությունների թույլտվության որևէ մեկը չի կարող այդպիսի զինանոց ունենալ:

Նույն տրամաբանությամբ՝ Մանվել Գրիգորյանը երեւի տեղյակ չի եղել նաեւ իր ավտոպարկում թանկարժեք ավտոմեքենաների առկայության մասին，գուցե դրանք եւս նրա նազիր-վեզիրներն են բերել ու շահագործել Մանվելի տարածքը։

Հիշեցնենք, որ Մանվել Գրիգորյանը ձերբակալվեց հունիսի 16-ին՝ ապօրինի ռազմամթերք ու զենք ձեռք բերելու կասկածանքով, իսկ երեկ՝ հունիսի 19-ին, կալանավորվեց։

Մանվել Գրիգորյանին պատկանող տարածքում հայտնաբերված և առգրավված ռազմամթերքը: Արշալույս գյուղի հանգստյան տուն 28 հասցեից խուզարկության ընթացքում առգրավվել է 18 հատ ՊԳ-7 տեսակի հակատանկային ականանետ, 20 հատ Ֆ-1 տեսակի նռնակ, 21.589 հատ տարբեր տրամաչափի փամփուշտ, տրոտիլ տեսակի պայթուցիկ նյութի 12 հատ 400-գրամանոց պայթաղյուս, 27 հատ ԿԴ տեսակի պայթուցիչ, 2 հատ գնդացրի փող և մի շարք այլ ռազմամթերք: Էջմիածին քաղաքի Ալավերդյան փողոցի տուն 46 հասցեում տեղակայված Մանվել Գրիգորյանին պատկանող առանձնատնից առգրավվել է 79 հրացան՝ գործարանային համարներով, 39 ատրճանակ՝ գործարանային համարներով, թվով 12.300 տարբեր տրամաչափի փամփուշտ: Առանձնատանը հայտնաբերվեցին նաև տասնյակ սեփականության վկայականներ:

Գրիգորյանին պատկանող հանգստյան տանը հայտնաբերվեց նաև թվով երեք ավտոպարկ, որտեղ առկա էին ժամանակակից թանկարժեք ավտոմեքենաների հավաքածու, ռետրո ավտոմեքենաների, մոտոցիկլետների և ձնագնացների հավաքածու: Ուշագրավ էր նաև այն, որ հայտնաբերվեց նաև ապրիլյան քառօրյա պատերազմի օրերին պաշտպանության բանակի համար նախատեսված ամենագնացների շարք, շտապօգնության մեքենա: Դրանք պաշտպանության բանակին էին նվիրաբերել Ռուսաստանի հայ համայնքի ներկայացուցիչները, որոնք Մ.Գրիգորյանը ձևակերպել է իր բարեկամների անուններով և տեղափոխել իր սեփական ավտոպարկ:

Պարզվում է զինվորների համար նախատեսված սնունդը, հայտնվելով Մանվել Գրիգորյանի պահեստարանում, օգտագործվել է նրա կենդանիների սնվելու համար։

Աղբյուր` Փաստինֆո