Փաստ ինֆո

«Իրականում չէի ցանկանա, որ տպավորություն ստեղծվի, որ ծառն ընկել է, կացնավորը՝ շատացել, որովհետև մի ծառ է ընկել, բայց դեմներս անտառներ են, բարձր ծառեր՝ հաստ բներով, և մի ծառն ընկնելուց այդքան պետք չի ուրախանալ, ոգևորվել և կացինը վերցնել ու հենց այդ մի ծառի վրա հարձակվել»:

Այդ մասին ԱԺ ՀՀԿ-ական պատգամավոր Մանվել Գրիգորյանին անձեռնմխելիությունից զրկելու հարցի քննարկման ժամանակ ԱԺ-ում ասաց ԵԼՔ խմբակցության պատգամավոր Էդմոն Մարուքյանը:

Էդմոն Մարուքյանը հայտարարեց, թե Մանվել Գրիգորյանի մասին չի ցանկանում խոսել, հարցը իրավական տիրույթում է, և իրենք էլ՝ որպես հասարակության ակտիվ անդամներ, ուշադիր կհետևեն:

ԵԼՔ խմբակցության պատգամավորը խոսեց պետական համակարգի, հասարակության մոտեցումների մասին և զենքի մասին:

«Այստեղ օրենք էր քննարկվում, և քննարկում էինք այն հարցը, թե այդ ինչպե՞ս է, որ Հայաստանում կան մարդիկ, ովքեր զինված են ու կան մարդիկ, ովքեր զինված չեն: Ու այն մարդիկ, ովքեր զինված են, նրանցից կա բնական վախ, որովհետև եթե դու գիտես, որ դիմացինդ զինված է ու կարող է կրակել քեզ վրա, դու արդեն իր նկատմամբ անհավասարության մեջ ես: Ես ասում էի՝ ժողովուրդ, կամ եկեք օրենք ընդունենք, Հայաստանում լեգալացնենք զենքը, որ բոլորն իմանան, որ հավասար են, ոչ թե հասարակության կեսը գիտի, որ այն մյուս կեսը զենք ունի և այս մի կեսը, որ խելոք չմնա, այն մյուս կեսը կկրակի իրենց վրա: Ինձ ասացին՝ այս ի՞նչ եք ասում, չեք ամաչում, ուզում եք մարդիկ իրար տան սպանե՞ն»:

Նա նաև նշեց, որ չպետք է ունենանք պետության ներսում փոքր, բայց՝ պետություններ: Պետք է պրոցես սկսել երկրում, որ իրենց պետության տեղ դրած ֆիզիկական և իրավաբանական անձանց օրենքով սահմանված կարգով չեզոքացնենք, ուրիշ տարբերակ չունենք:

«Ես կարծում եմ, որ մենք պետք է վերջ դնենք ինչ-որ թիկնապահներով ման եկող մարդկանց վարք ու բարքին: Այս հարցը ինձ միշտ հուզել է, ես նախորդ իշխանությունների ժամանակ դիմել եմ պետական համապատասխան ծառայություններին, եւ ցանկացել եմ պարզել այս հարցի պատասխանը:

Ո՞վ ունի երկրում իրավունք՝ փարոսիկներով, անվտանգության մեքենաներով ման գալու, ասել են անվտանգության խորհրդի անդամները, ասել եմ՝ լավ: Բայց տեսնում եմ՝ մարդիկ կան, որ էլի այդ նույն մեքենաներով շրջում են, բայց անվտանգության խորհրդի անդամ չեն»:

Բացի այդ, նա նշեց, որ ԱԺ-ում խոսել է պետական պաշտոնյաների հայտարարագրերի և նրանց կենսագրականների մասին. «Նայում ենք կենսագրությունը, 2002 թվականից պետական ծառայության մեջ է: Պաշտոնները նայում եմ, ասենք 2001 թվականից ստացել է 200 հազար դրամ, 2008 թվականից՝ 300 հազար դրամ, 2013-ից էլ ասենք ստացել է 400 հազար դրամ: Ու հայտարարագրել է ասենք 7 մլն դոլար, 8 մլն եվրո, քանի կարատանոց չգիտես ինչ, 60 հեկտար հող, 40 հեկտար շինություն, 70 հատ մեքենա: Մեկդ չէ՞ր հարցնում՝ այ ախպեր ջան, էս որտեղի՞ց քեզ, էս ո՞նց ես դու հարստանում, էս ի՞նչ պրոգրեսիա է քեզ մոտ, էս ինչքան են գործերդ լավ: Մեր պետության գործերը քո գործերի պես լավ լինի, էլ մեզ բռնվելիք չի լինի, ի՞նչ թուրքեր, ի՞նչ թշնամիներ, ի՞նչ բլոկադա: Բայց էլի խոսել ենք, անցել գնացել է: Հիմա էլ եկել ենք, էլի թեմա է բացվել, թեմայի շուրջ խոսում ենք, հարցնում եք՝ բա էդ դաստով վկայականները որտեղի՞ց է, բա դրա մասին անընդհատ խոսում էինք»:

ԱԺ պատգամավորը կողմ է հարստությանը, հարգում է բոլոր հարուստներին: Հարուստները, գործարարները հասարակության, տնտեսության շարժիչ ուժն են: Մենք նրանց պետք է պաշտպանենք, փայփայենք, սիրենք, հարգենք, պատվենք: Բայց ես չեմ հասկանում, ասենք, դոլարով միլիոնատեր նախարարներին, երբեք չեմ էլ հասկացել, թե այդ ի՞նչ հայրենասերներ են, այդ ովքեր են դրանք, որ դոլարով միլիոնատեր են, բայց եկել են, որ 500 հազար դրամով աշխատեն, գան այստեղ նստեն մենք էլ իրենց վրա ասենք գոռգոռանք: Այդ ո՞րն է այդ մարդու մոտիվացիան, այդ ի՞նչ է ուզում այդ մարդը անի: Այդ հարցը միշտ բարձրացրել ենք, հիմա լավ է, չունենք նման նախարարներ, բայց արդյո՞ք պետք է հետ գնանք, նայենք, տեսնենք՝ այս մարդիկ ինչ են արել, մեր պետության առջեւ ծառացած խնդիրները լուծելու շրջանակներում ի՞նչ գույնի են հարստացել:

«Ես ասում եմ հետևյալը՝ մենք, որպես հասարակություն, այսպիսի դեպքերով խայտառակ ենք եղել: Թող ոչ ոք չասի՝ մենք ինչ կապ ունենք, սա հասարակական հիվանդություն է: Պետք է բոլորով համախմբված սրանով զբաղվենք: Կոչ եմ անում նրանց, ովքեր դեռ չեն հայտնվել այս իրավիճակում, ում հետեւից չի եկել գլխավոր դատախազը, թող կամավոր տանեն իրենց զենքը, հանձնեն ոստիկանություն, կամավոր գնան, ասեն՝ ես այսքան հարկ եմ թաքցրել, բերեք վճարենք պետական բյուջե: Ես դեմ եմ ցանկացած թշնամության: Այս երկիրը մենք իրավական պետություն ենք ուզում կառուցել, երբ որ դատարանը կորոշի, երբ որ դատարանը դատավճիռ կարձակի մեղավորության կամ արդարության մասին, դրանից ելնելով մենք կհամակերպվենք իրավիճակին:

Չե՞նք համակերպվի, կլինի վերադաս դատարան, սա է պետության կառուցման ճանապարհը, ուրիշ ճանապարհ չկա, ոչ մեկին չենք կարող գնդակահարել եւ լինչի դատաստան կազմակերպել:
Սա իրավական պետություն է և մենք չենք կարող իրավական պետություն չունենալ, որովհետև այլ ռեսուրսներ չունենք, մեր ռեսուրսը մարդն է, ժողովրդավարությունն է, քաղաքացիական հասարակությունն է, իրավունքի գերակայության վրա խարսխված ինստիտուտներ ձեւավորելն է, եւ շարժվել առաջ մեր պետության առջեւ դրված առաքելությունը իրականացնելն է»,- ասաց Մարուքյանը:

Աղբյուր` Փաստինֆո