Փաստ ինֆո

Հունիսի 16-ի երեկոյան ԱԱԾ-ն հայտարարեց ԱԺ պատգամավոր Մանվել Գրիգորյանի ձերբակալության մասին, ով կասկածվում է ՀՀ քրեական օրենսգրքի 235-րդ հոդվածի 2-րդ մասով նախատեսված արարք, այն է՝ մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելու մեջ։ Նկատենք, որ նա ունի պատգամավորական անձեռնմխելիություն եւ ըստ ՀՀԿ-ի պաշտոնական հայտարարության նրա ձերբակալությունն ուղեկցվել է պատգամավորի անձեռնմխելիության Սահմանադրական ընթացակարգերի խախտմամբ։

Թե որքանով է մեղսագրված կասկածանքը հիմնավոր, որքանով ձերբակալությունը օրինական՝ հուսանք կպարզվի առաջիկայում եւ իրավասու մարմինները կներկայացնեն անհրաժեշտ հիմնավորումները, իսկ, թե  արդյոք այն կնպաստի Էջմիածնում իրավիճակի լիցքաթափմանը՝ ցույց կտան առաջիկա զարգացումները։ Համենայն դեպս՝ այս պահին Էջմիածնում շարունակվում են Մանվել Գրիգորյանի քաղաքապետ որդու՝ Կարեն Գրիգորյանի հրաժարականը պահանջողների եւ կողմնակիցների հանրահավաքները, իսկ Երեւանում երեկ գիշերվանից բողոքի ակցիաներ են իրականացնում նաեւ գեներալ Մանվելի կողմնակիցները։

Ներկայումս փաստենք, որ ԱԱԾ պաշտոնական հաղորդագրության համաձայն՝ քրեական գործ հարուցելու հիմք են հանդիսացել օպերատիվ տեղեկությունները, որի շրջանակներում խուզարկություններ են իրականացվել Մանվել Գրիգորյանի տանը, ամառանոցում և նրան պատկանող այլ տարածքներում: Հայտնաբերվել է ապօրինի կերպով  պահվող մեծ թվով զենք և ռազմամթերք: Թե ինչ տեսակի ու քանակի զենք եւ ռազմամթերք է հայտնաբերվել՝ ԱԱԾ-ն առայժմ չի մանրամասնում։

ՀՀ Սահմանադրության 96-րդ հոդվածի 2-րդ մասի համաձայն՝ պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ: Պատգամավորն առանց Ազգային ժողովի համաձայնության չի կարող զրկվել ազատությունից, բացառությամբ երբ նա բռնվել է հանցանք կատարելու պահին կամ անմիջապես դրանից հետո: Այս դեպքում ազատությունից զրկելը չի կարող տևել յոթանասուներկու ժամից ավելի: 

Այսինքն՝ 72 ժամվա ընթացքում ձերբակալվածին, տվյալ պարագայում  ԱԺ պատգամավոր Մանվել Գրիգորյանին պետք է մեղադրանք առաջադրվի:

ՀՀ քրեական դատավարության օրենսգրքի 130-րդ հոդվածն սահմանում է, որ  կասկածյալին նշված ժամկետում կարող է մեղադրանք չառաջադրվել, եթե նա արգելանքի վերցվելու պահից 72 ժամվա ընթացքում իր նկատմամբ անազատության մեջ պահելու հետ չկապված խափանման միջոց կիրառելու կամ խափանման միջոց չընտրելու հետևանքով ազատվել է արգելանքից:

Տվյալ իրավիճակում ըստ էության երկու զարգացում կարող է լինել՝ կամ Մանվել Գրիգորյանն ազատ է արձակվում արգելանքից կամ դատախազությունը պետք է հրատապ միջնորդություն ներկայացնի ԱԺ՝ նրան պատգամավորական անձեռնմխելիությունից զրկելու համար։

ԱԺ կանոնակարգ ՀՀ օրենքի 98-րդ հոդվածն ուղղակի ամրագրում է, որ պատգամավորին որպես մեղադրյալ ներգրավելու, կալանավորելու հարց հարուցելու համար համաձայնություն տալու մասին միջնորդագիրը Գլխավոր դատախազը ներկայացնում է Ազգային ժողովի նախագահին, որն այդ մասին անմիջապես տեղեկացնում է պատգամավորին և ապահովում միջնորդագրի տրամադրումը պատգամավորներին Ազգային ժողովի նստավայրում: Ընդ որում՝ միջնորդագրի վերաբերյալ Ազգային ժողովի որոշումներն ընդունվում են գաղտնի քվեարկությամբ, քվեարկությանը մասնակցած պատգամավորների ձայների մեծամասնությամբ, եթե քվեարկությանը մասնակցել է պատգամավորների ընդհանուր թվի կեսից ավելին:

ՀՀ դատախազությունը դեռ որեւէ կերպ չի արձագանքել պատգամավորի ձերբակալությանը եւ առայժմ պաշտոնապես չի հայտնվում միջնորդագիր կներկայացվի՞ Մանվել Գրիգորյանին պատգամավորական անձեռնմխելիությունից զրկելու համար թե՞ ոչ, եւ ներկայացվելու դեպքում դատախազը կպահանջի միայն քրեական հետապնդում հարուցելու թույլտվությո՞ւն, թե՞ նաեւ՝ կալանավորելու։

Ի դեպ, դատախազությունը չի պարզաբանել, թե ինչու է ԱԱԾ-ն քննում ԱԺ պատգամավորի վերաբերյալ քրեական գործը, երբ նա հատուկ սուբյեկտ է։ ՀՀ քրեական դատավարության օրենսգրքի 190-րդ հոդվածն սահմանում է, որ պատգամավորների կողմից կատարված հանցագործությունների վերաբերյալ գործերի նախաքննությունը պետք է իրականացնեն ՀՀ հատուկ քննչական ծառայության քննիչները։ ԱԱԾ-ի ենթակա գործերի շրջանակը եւս հստակ ամրագրված է նույն հոդվածով, որոնց թվում  ՀՀ քրեական օրենսգրքի 235-րդ հոդվածը նախատեսված չէ։ Իհարկե՝ անհրաժեշտության դեպքում Հայաստանի Հանրապետության գլխավոր դատախազը կարող է հատուկ հանձնարարությամբ ՀՔԾ-ին ենթակա քրեական գործի նախաքննությունը հանձնարարել այլ քննչական մարմնի, եթե դրա փաստական հանգամանքներով պայմանավորված` առկա է բազմակողմանի, լրիվ և օբյեկտիվ քննությունը երաշխավորելու անհրաժեշտություն: Արդյոք այս պարագայում դատախազությունը մտավախություն է ունեցել, որ ՀՔԾ-ն չի կարողանա ապահովել նախնական քննության փուլում բազմակողմանի, օբյեկտիվ եւ լրիվ քննության իրականացումն, ուստի հանձնարարել է, որ ԱԱԾ-ն իրականացնի նախաքննությունը։

Աղբյուր` Փաստինֆո