Փաստ ինֆո

Քիչ առաջ մի խումբ երկրապահներ  բողոքի ակցիա են իրականացնում ԱԱԾ շենքի մոտ և պահանջում են ազատ արձակել գեներալ, ԵԿՄ նախագահ, ԱԺ պատգամավոր Մանվել Գրիգորյանին: Նշենք, որ վերջինս ձերբակալվել է այսօր  հետո ԱԱԾ -ում հարուցված քրեական գործի շրջանակներում եւ կասկածվում է մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը։ Այս պահին բավական լարված իրավիճակ է ԱԱԾ շենքի մոտ։

Պատգամավորի ձերբակալությանն արձագանքել է ՀՀԿ-ն՝ մտահոգություն հայտնելով կատարվածի կապակցությամբ եւ  ընդգծել, որ այն տեղի է ունեցել պատգամավորի անձեռնմխելիության Սահմանադրական ընթացակարգերի խախտմամբ։

«Ուշադրության է արժանի այն հանգամանքը, որ զենք պահելու կասկածանքով կարող է ապօրինի ձերբակալվել ՀՀ ԱԺ պատգամավոր, մինչդեռ զենքի անմիջական գործածման հետ կապ ունեցող անձինք ազատվում են կալանքից` ՀՀ նոր իշխանությունների հայտարարած քաղաքականության շրջանակներում: Այս ամենը հիմք է տալիս ենթադրելու, որ այսօր կատարված գործողությունների հիմքում ընկած են առավելապես քաղաքական դրդապատճառներ: Մենք ուշադրության կենտրոնում ենք պահելու այս հարցի լիարժեք և անաչառ քննությունը և պայքարելու ենք Մանվել Գրիգորյանի իրավունքների ամբողջական պաշտպանության համար »,- հայտարարել է ՀՀԿ-ն։

ՀՀԿ փոխնախագահ Արմեն Աշոտյանը ֆեյսբուքում հայտնել է, որ ձերբակալված պատգամավորին տեսակցելու համար ԱԱԾ են գնացել նաեւ ԱԺ փոխնախագահ Էդուարդ Շարմազանովն ու ՀՀԿ խմբակցության ղեկավար Վահրամ Բաղդասարյանը։

ԱԺ մյուս խմբակցություններն  առայժմ չեն արձագանքել պատգամավորի ձերբակալությանը։ Դատախազությունը եւս չի պարզաբանել, թե որքանով է եղել իրավաչափ Մանվել Գրիգորյանի ձերբակալությունը։

Նշենք, որ ձերբակալվել է նաեւ Դոն Պիպո մականունով հայտնի Արթուր Ասատրյանը։ Իսկ ձերբակալությունները հաջորդեցին վերջինիս կողմից Էջմիածնում քաղաքապետի արտահերթ ընտրությունների պահանջով կազմակերպված բողոքի ակցիաներին։

ՀՀ վարչապետ Նիկոլ Փաշինյանը նախօրեին անընդունելի էր համարել, որ  «քրեածին տարրերը պղծեն սիրո և համերաշխության հեղափոխության խորհրդանիշերը և հեղափոխության անունն օգտագործեն մաֆիոզ պատերազմներում: Թույլ չենք տա»։ Նրա այս հայտարարությունից հետո հայտնի դարձավ, որ ԱԱԾ-ն գործողություններ է իրականացնում Էջիմածնում, որի արդյունքում հայտարարվեց նաեւ պատգամավոր, Արցախի հերոս Մանվել Գրիգորյանի ձերբակալության մասին։

Աղբյուր` Փաստինֆո