Փաստ ինֆո

ՀՀ պաշտպանության նախկին նախարար Սեյրան Օհանյանը չի ստացել ՊԵԿ-ի կողմից հարցաքննության կանչվելու վերաբերյալ ծանուցումը: Այդ մասին «Փաստինֆո»-ի թղթակցի հետ զրույցում ասաց Սեյրան Օհանյանը:

Հիշեցնենք, որ նախօրեին ՊԵԿ-ը պաշտոնական հաղորդագրություն էր տարածվել ՊՆ-ում 2014-2017թթ.-ի ընթացքում գնումների և բանակաշինության ոլորտներում առկա չարաշահումների վերաբերյալ ՊԵԿ քննչական վարչությունում քննվող քրեական գործով նախաքննության ընթացքում ձեռք բերված բավարար ապացույցների համակցության հիման վրա ՊՆ ԿՇ և ԶԲ վարչության արտադրատեխնիկական բաժնի նախկին պետ Գրիգոր Բարսեղյանին մեղադրանք է առաջադրվել պաշտոնական լիազորությունները չարաշահելու, առանձնապես խոշոր չափերով խարդախության, առանձնապես խոշոր չափերով կաշառք ստանալու, փաստաթուղթ կեղծելու համար, իսկ ՊՆ ԿՇ և ԶԲ վարչության պետ Աշոտ Գրիգորյանին` առանձնապես խոշոր չափերով խարդախության փորձի, պաշտոնական լիազորությունները չարաշահելու, պաշտոնական փաստաթուղթ կեղծելու համար։

Հիշյալ հաղորդագրությամբ նաև ասվում էր, որ hարցաքննության են կանչվել ինչպես նախկին, այնպես էլ ներկայիս ՊՆ բարձրաստիճան պաշտոնատար անձինք, այդ թվում նաև ՊՆ նախկին նախարար Սեյրան Օհանյանը:

Մեզ հետ զրույցում Սեյրան Օհանյանը նշեց՝ այդ հաղորդագրությունն ընթերցել է լրատվամիջոցներում և տեղեկացված է այդքանով՝ ոչ ավելին, և երբ ստույգ տեղեկություններ կունենա համապատասխան արձագանք կլինի իր կողմից:

Նա նաև նշեց, որ հնարավոր է որոշակի հարցեր կան ՊՆ-ի հետ կապված և իրենից փորձ է արվում այդ հարցերի պարզաբանումը ստանալ և դրանում որևէ ողբերգություն չկա, համենայն դեպս այս պահին որևէ ծանուցագիր չի ստացել հարցաքննության հրավիրվելու մասին:

Նշենք նաև, որ տարածված հաղորդագրությունից հետո՝ ժամեր անց ՊԵԿ-ը հստակեցրել էր, թե նախկին նախարարին ծանուցումն ուղարկվել է հունիսի 12-ին:

Արդյո՞ք ՊԵԿ-ի այս հաղորդագրությունը վաղաժամ չէր, այն դեպքում, երբ հարցաքննության հրավիրված անձինք նույնիսկ ծանուցում չեն ստացել հարցին ի պատասխան՝ Սեյրան Օհանյանն, ասաց, թե չգիտի, քանի որ տեղյակ չէ, թե ինչ գործի մասին է խոսքը և ընդամենը ընթերցելով է տեղեկացվել:

Աղբյուր` Փաստինֆո