Փաստ ինֆո

2015թ. հունվարի 29 -ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության մեջ մեղադրվող Նորիկ Սահակյանը հերքում է իր առնչությունն սպանությանը:

Երևան քաղաքի ընդհանուր իրավասության դատարանում՝ դատավոր Դավիթ Հարությունյանի նախագահությամբ, այսօր շարունակվեց գործ քննությունը։ Ամբաստանյալ Նորիկ Սահակյանը հրաժարվեց ցուցմունքներ տալ և պատասխանել դատավարության մասնակիցների հարցերին， ուստի  դատարանը որոշեց հրապարակել նրա նախաքննական ցուցմունքները:

Ըստ այդ ցուցմունքների՝ Նորիկ Սահակյանը Հայկազ Բասեղյանի սպանության մասին տեղեկացել է դեպքի հաջորդ օրն առավոտյան՝ հունվարի 29-ին, իսկ դեպքին նախորդ օրը՝ Սահակյանի ցուցմունքի համաձայն՝ ինքն այլ կուրսանտների հետ եկեղեցի է գնացել, վերադառնալուց հետո էլ՝ երեկոյան քուն հրամանից հետո գնացել է քնելու，իսկ  ժամը 01:00-ի սահմաններում արթնացել է դաս սովորելու նպատակով: Սահակյանը նաև նշել է, որ դաս սովորելիս միայնակ չի եղել， այլ  Հովիկ Հովհաննիսյանի և ևս մեկ այլ կուրսանտի հետ: Դաս սովորելու ժամանակ նրանք սուրճ են խմել, որից հետո  գնացել են քնելու:

Ինչ վերաբերում է իր մեզի մեջ հայտնաբերված ալկոհոլի առկայությանը,  ապա Սահակյանը պնդել է, թե ինքն ալկոհոլ առհասարակ չի օգտագործում և պահանջել է, որպեսզի կրկնակի փորձաքննություն նշանակվի:

Քրեական գործով նախաքննության ընթացքում կատարված առերես հարցաքննությունների ժամանակ Նորիկ Սահակյանը պնդել է, թե իր դեմ ցուցմունք տվողները ստում են, ինքը որևէ առնչություն չի ունեցել սպանության հետ և խնդրել է իրական սպանողին հայտնաբերել:

Նշենք, նաև որ դատավարության՝ հատկապես դատախազների, տուժողի իրավահաջորդի և դատարանի կողմից Սահակյանին ուղղված հարցերն անպատասխան մնացին՝ օգտվելով իր դատավարական իրավունքից նա  հրաժարվեց որևէ հարցի պատասխանել:

Սպանված Հայկազ Բարսեղյանի հայրը՝ Արկադի Բարսեղյանը， հայտարարությամբ հանդես եկավ՝ «Սահակյանի ծնողների հետ խոսել եմ և նրա մայրն ընդունել է որդու կողմից կատարվածն ասելով՝ գիտե՞ս որ ընդունի ինչ կլինի բերդում, մանավանդ, որ իմանան միլիցու տղա է»: Տուժողի իրավահաջորդը նույնիսկ հայտնեց, թե որտեղ է տեղի ունեցել այս զրույցը:

Այսօր նաև հրապարկվեցին նաեւ  գործով մյուս ամբաստանյալ Վարազդատ Սաֆարյանի նախաքննական ցուցմունքները, վերջինս ևս դատարանում հրաժարվեց ցուցմունք տալ:

Վարազդատ Սաֆարյանը Հայկազ Բարսեղյանի սպանության դրվագով չի անցնում, նա մեղադրվում է կուրսանտ Տ.Մանասերյանին շարքում խոսելու համար դիտողություն անելու և վերջինիս կողմից հակադարձում ստանալուց հետո Վաչե Սահակյանի, Մովսես Ազարյանի հետ միասին, մի խումբ անձանցով Մանասերյանին ծեծի ենթարկելու մեջ: Բացի այդ՝ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին:

Նշենք, որ քրեական գործում լուսանկաներ կան, որոնք ի դեպ արված են Վաչե Սահակյանի տարեդարձը նշելու առիթով կուրսանտների կողմից կազմակերպված հացկերույթի օրը:

Վարազդատ Սաֆարյանը ընդունեց, որ այդ լուսանկարներում ինքն է պատկերված, ինչպես նաեւ Վաչե Սահակյանն ու Մովսես Ազարյանը:

Նա նաև չհերքեց， որ այդ օրը խմիչք են օգտագործել, օղի են խմել 2-3 բաժակ, որից հետո գնացել են քնելու:

Քրեական գործով երկու ամբաստանյալներ Վաչե Սահակյանն ու Մովսես Ազարյանը հրաժարվեցին այսօր ցուցմունքներ տալ՝ պատճառաբանելով, որ առողջական խնդիրներ ունեն և ցուցմունք կտան հաջորդ դատական նիստին:

Աղբյուր` Փաստինֆո