Փաստ ինֆո

«Ժողովուրդ» թերթի դիտարկմամբ՝ «Սևանում՝ Գեղարքունիքի մարզի ընդհանուր իրավասության դատարանի բակում, երեկ հնչած կրակոցներն առանց վարանելու կարելի է որակել վենդետայի հերթական դրսևորում:

 2017 թ. հունվարի 7-ին սպանվել էր Գեղարքունիքի փոխմարզպետի որդին՝ Հայկ Հակոբյանը: Սպանության գործով որպես մեղադրյալ է ներգրավվել Մեխակ Հարությունյանը, ում դատավարությունն էր երեկ: Եվ ահա մինչ դատը սկսվելը մեղադրյալի ու սպանվածի հարազատների միջև վիճաբանությունն ավարտվել է կրակոցներով:

«Ժողովուրդ» օրաթերթը տեղեկացավ, որ որևէ զոհ չի եղել, այլ միայն մեկ հոգի է վիրավորվել: Պետք է արձանագրենք, որ սա վենդետայի հերթական դրսևորումն է. նախորդ տարի կրակոցներ էին հնչել նաև Երևանում` Վերնիսաժին հարող տարածքում. այն ժամանակ էլ ալավերդցի քրեական հեղինակություններն էին որոշել իրենց հին հարցերը լուծել զենքով: Նման դեպքեր եղել են նաև ավելի վաղ ոչ միայն Երևանում, այլև ՀՀ մյուս բնակավայրերում:

Երեկ տեղի ունեցածը հերթական ահազանգն է այն բանի, որ իրավապահ համակարգը շատ անելիքներ ունի կանխարգելիչ գործողություններ իրականացնելու և արյունահեղությունները բացառելու ուղղությամբ: Իսկ այդ հարցում առաջնահերթ քայլերից մեկն էլ կարող է լինել ապօրինի զենք-զինամթերքի հայտնաբերումն ու առգրավումը:

Համաձայնեք, ՀՀ ոստիկանապետ Օսիպյանն ու ԱԱԾ պետ Վանեցյանն ի պաշտոնե գիտեն կամ կարող են իմանալ, թե որ պաշտոնյաների, պատգամավորների, օլիգարխների, քրեական ու թաղային հեղինակությունների, նրանց մերձավոր ազգականների մոտ կա ապօրինի զենք-զինամթերք: Այնպես որ, հիմա իրավապահների առաջնահերթ պարտականություններից մեկը պետք է լինի ապօրինի զենքերը հայտնաբերելն ու առգրավելը: Այս հարցում իր անելիքն ունի նաև վարչապետ Նիկոլ Փաշինյանը. ի վերջո ոստիկանությունն ու ԱԱԾ-ն իր ենթակայության ներքո են գործում, հետևաբար ինքը կարող է խիստ հրահանգ իջեցնել` հետևելով հանձնարարությունների կատարման ընթացքին»:

Հոդվածն ամբողջությամբ կարող եք կարդալ «Ժողովուրդ»-ի՝ 09.06.18թ. համարում

Աղբյուր` Փաստինֆո