Փաստ ինֆո

Ազգային Ժողովի «Ելք» խմբակցության պատգամավորներ Ալեն Սիմոնյանը և Հայկ Կոնջորյանը անձնական երաշխավորություն կներկայացնեն ՊՊԾ գնդի գործով ամբաստանյալ Արամ Մանուկյանի խափանման միջոց կալանքը փոխելու վերաբերյալ:

Այս մասին տեսաուղերձով հայտնել է Հայկ Կոնջորյանը:

«Ես և Ալեն Սիմոնյանը պատրաստվում ենք քիչ անց երաշխավորություն ստորագրել Պավլիկ Մանուկյանի որդու` Արամ Մանուկյանի խափանման միջոցը փոխելու վերաբերյալ: Արամ Մանուկյանն ունի նաև առողջական խնդիրներ, և նրա առողջական վիճակը գնալով չի կարգավորվում: Դա առավել հրատապ է դարձնում, որպեսզի մենք փորձենք նրա խափանման միջոցը փոխել, և որպեսզի նա ազատության մեջ սպասի վճռին ու հնարավորություն ունենա կարգավորել իր առողջական խնդիրները»,- ասել է Կոնջորյանը:

Արամ Մանուկյանը մեղադրվում է Քրեական օրենսգրքի 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 3-րդ մասի, 219-րդ հոդվածի ( շենքեր, շինություններ, տրանսպորտի, հաղորդակցության կամ կապի միջոցներ զավթելը) 3-րդ մասի 1-ին կետի, 218-րդ հոդվածի (պատանդ վերցնելը) 3-րդ մասի 1-ին կետի, 238-րդ հոդվածի (զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը) 4-րդ մասի 1.2 կետերի, 185-րդ հոդվածի (գույքը դիտավորությամբ ոչնչացնելը կամ վնասելը) 3-րդ 1-ին մասի հատկանիշներով:

Աղբյուր` Փաստինֆո