Փաստ ինֆո

Վարչապետ Նիկոլ Փաշինյանն անդրադարձավ այն խոսակցությունների, թե կառավարության ծրագիրը պետք է լիներ «Ելք»-ի, Ծառուկյան դաշինքի և ՀՅԴ-ի նախընտրական ծրագրերի հիման վրա: «Մենք կրկին քաղաքական իրավիճակը պետք է ճիշտ գնահատենք: Այո, ես «Ելք» դաշինքի անդամ եմ, բայց ես ՀՀ վարչապետ ընտրվել եմ ոչ որպես «Ելք» դաշինքի թեկնածու և ոչ էլ որպես այլ խմբակցության թեկնածու: Ես վարչապետ ընտրվել եմ որպես ՀՀ ժողովրդի թեկնածու: Եվ հիմնական քաղաքական գործոնը, որ պահելու է կառավարությունը՝ ժողովրդի վստահությունն է»,-  ասաց Նիկոլ Փաշինյանը՝ Ազգային ժողովում կառավարության ծրագրի քննարկման եզրափակիչ ելույթում:

Վարչապետն ընդգծեց, որ շատ լավ գիտի՝ այն պահին, երբ իրենք չունենան ժողովրդի վստահությունը՝ հինգ րոպե էլ չի տևի իրենց  մնալը կառավարությունում: «Այն պահին, երբ ես անձամբ զգամ, որ չունեմ ժողովրդի վստահությունը՝ հինգ րոպե ավել չեմ մնա վարչապետի պաշտոնում: Մենք բոլորս հասկանում ենք, որ Ազգային ժողովն ինձ վարչապետ ընտրել է ի հեճուկս սեփական ցանկությունների, որևէ մեկը թող չասի, որ լավություն է արել ինձ կամ որևէ մեկին Հայաստանի Հանրապետության վարչապետ ընտրելով: Եվ որևէ մեկը թող չմտածի, որ ինձ կամ կառավարությանը լավություն է անելու կառավարության ծրագրին կողմ քվեարկելով: Մենք որևէ մեկի լավության կարիքն Ազգային ժողովում չունենք: Ուզում եք կողմ քվեարկեք, ուզում եք դեմ քվեարկեք»,- ընդգծեց Փաշինյանը՝ ավելացնելով, որ իրենք ունեն ժողովրդի վստահությունը, որը պետք է դառնա կոնկրետ քաղաքական արդյունք անկախ նրանից՝ ԱԺ-ում որևէ մեկն ուզում է, թե ոչ:                                                     

Աղբյուր` Փաստինֆո