Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և կաշառքի միջնորդության մեջ մեղադրվող փաստաբան Էլզա Զաքարյանի գործով շուրջ 1,5 տարի տևած գործի քննությունը մոտենում է հանգուցալուծման:

Քրեական գործը դատական վիճաբանությունների փուլում է, ճառերով հանդես են եկել ՀՀ գլխավոր դատախազության հատկապես կարևոր գործերով քննության նկատմամբ հսկողության վարչության պետի տեղակալ, արդարադատության առաջին դասի խորհրդական Կարեն Բիշարյանը և ամբաստանով փաստաբան Էլզա Զաքարյանի պաշտպանը: Հաջորդ դատական նիստում նախատեսվում է դատավոր Բարսեղյանի պաշտպանների ճառը:

Դատախազ Կարեն Բիշարյանը իր մեղադրական ճառում միջնորդել է Իշխան Բարսեղյանին դատապարտել 8 տարի ժամկետով ազատազրկման՝ առանց գույքի բռնագրավման:

Այսպիսով, դատախազը գտել է, որ դատաքննությամբ հետազոտված ապացույցների բավարար համակցությամբ հաստատվել է ամբաստանյալ Իշխան Բարսեղյանի մեղավորությունը՝ Նորիկ Հակոբյանի օգտին իր լիազորությունների շրջանակում որոշակի գործողություններ կատարելու համար նրանից միջնորդի միջոցով խոշոր չափերով կաշառք ստանալու մեջ:

Գործով մյուս ամբաստանյալ Էլզա Զաքարյանի մեղավորությունը՝ կաշառք տվողի և կաշառք ստացողի միջև կաշառքի շուրջ համաձայնության գալուն ու կայացած համաձայնության իրականացմանը նպաստելով կաշառքի միջնորդություն կատարելու մեջ, ևս հաստատվել է:

Մասնավորապես, ըստ մեղադրողի, ապացուցվել է, որ դատավոր Իշխան Բարսեղյանը Նորիկ Հակոբյանի հակընդդեմ հայցը վարույթ ընդունելու և քաղաքացիական գործով նրա համար նպաստավոր դատական ակտ կայացնելու համար միջնորդի՝ փաստաբան Էլզա Զաքարյանի միջոցով Հակոբյանից 2016թ. հոկտեմբերի 27-ին պահանջել և նույն օրը՝ ժամը 19.35-ի սահմաններում, Երևանի Արշակունյաց պողոտայի և Գ.Նժդեհի փողոցի խաչմերուկի գետնանցումում Նորիկ Հակոբյանից անձամբ ստացել է խոշոր չափերով՝ 475.230 ՀՀ դրամին համարժեք 1000 ԱՄՆ դոլար կաշառք:

Անդրադառնալով ամբաստանյալների անձը բնութագրող և նրանց պատասխանատվությունը և պատիժը ծանրացնող ու մեղմացնող հանգամանքներին՝ դատախազը նշում է, որ դատավոր Բարսեղյանը ամուսնացած է, ունի բարձրագույն կրթություն, նախկինում դատապարտված չէ:

Բացի այդ, տառապում է մի շարք հիվանդություններով, նրա մոտ ախտորոշվել է սրտի իշեմիկ հիվանդություն, աթերոսկլերոտիկ կարդիոսկլերոզ, զարկերակային հիպերտենզիա և մի շարք այլ հիվանդույուններ:

Ինչ վերաբերում է պատասխանատվությունը մեղմացնող և ծանրացնող հանգամանքներին, ապա այդպիսիք առկա չեն:

Գործով մյուս ամբաստանյալ Էլզա Զաքարյանն ամուսնացած է, ունի բարձրագույն կրթություն, խնամքին են երկու անչափահաս երեխա, նախկինում դատապարտված չէ:

Էլզա Զաքարյանի վերաբերյալ էլ դատախազը միջնորդել է մեղավոր ճանաչել ՀՀ քրեական օրենսգրքի 313-րդ հոդվածի 1-ին մասով, սակայն ՀՀ քրեական օրենսգքրի 72-րդ հոդվածով նախատեսված՝ գործուն զղջալու հիմքով, ազատել նրան քրեական պատասխանատվությունից՝ ՀՀ քրեական դատավարության օրենսգրքի 37-րդ հոդվածով սահմանված կարգով նրա նկատմամբ դադարեցնելով քրեական հետապնդումը՝ նկատի ունենալով, որ վերջինս առաջին անգամ կատարել է միջին ծանրության հանցանք, և հանցանք կատարելուց հետո կամովին ներկայացել է մեղայականով, աջակցել է հանցագործությունը բացահայտելուն:

Նշենք, որ Իշխան Բարսեղյանը Շենգավիթ վարչական շրջանի դատարանի դատավորի պաշտոնն է զբաղեցրել 1999 թվականից:

Աղբյուր` Փաստինֆո