Փաստ ինֆո

Ռուսաստանի Սպեցստրոյի նախկին փոխտնօրեն, գեներալ Ալեքսանդր Զագորուլկոն անհայտ անձանց կողմից առևանգվել է, նրանք մի քանի օր խոշտանգել են նրան քաղաքից դուրս գտնվող տանը զոդիչի, արդուկի ու էլեկտրոշոկերի օգնությամբ, հաղորդում է RenTV ալիքը:

Հեռուստաալիքի տվյալներով, առևանգումը ծրագրվել է դեռևս ձմռանը. առևանգիչներից մեկը խնդրել է իր ծանոթին թույլ տալ իրեն մի քանի օր ապրել Ռամենսկի շրջանի Զաբոլոտյե ավանի նրա տանը:

Չնայած այն բանին, որ տունն արդեն վարձակալության էր տրվել, ծանոթը համոզել էր վարձակալողին մեկ շաբաթով գնալ: Սակայն շուտով տղամարդը ստիպված էր վերադառնալ, նրան զանգահարել էին հարևաններն ու ասել, որ շուրջը հերթապահություն է անցկացնում ոստիկանությունը:

Ըստ տղամարդու, քրեագետները տնից բացի արդուկից ու շոկերից առգրավել էին նաև զոդիչն, ինչ-որ իրերով սև փաթեթը, ծխախոտի մնացորդներ: Խուզարկություններից ու հարցաքննությունից հետո քննիչներն ու օպերատիվ աշխատողները լքել էին տունը: Ասել էին տանտիրոջը, որ եթե հարկ լինի, կկանչեն, սակայն նրանք չեն զանգել:

Հեռուստաալիքի տվյալներով, արդուկով, շոկերով ու զոդիչով Ալեքսանդր Զագորուլկոյին խոշտանգել են նրանից իմանալու համար, թե որտեղ է նա պահում իր խնայողությունները: Արդյունքում Զագորուլկոն պատմել է, որ իր քաղաքից դուրս գտնվող տան բանջարանոցում թաղված է պայուսակ 100 մլն ռուբլով:

Ինքը՝ Ալեքսանդր Զագորուլկոն առևանգման, խոշտանգումների ու շորթման համար ոստիկանություն չի դիմել: Հայտնի է, որ վերջին ժամանակներս նա հաճախ այցելում է գերատեսչական պոլիկլինիկա, որտեղ բուժման կուրս է անցնում:

Ի դեպ, Զագորուլկոն մեղադրվում է խոշոր հափշտակությունների մեջ: Քննության վարկածով, բյուջետային միջոցները հափշտակվել էին ՊՆ օբյեկտների շինարարության ժամանակ: Բարձրացրած արժեքով պայմանագրերից հափշտակության գումարը գերազանցում է 1 մլրդ ռուբլին: Օրերս ՊՆ-ն քաղաքացիական հայց է ներկայացրել Զագորուլկոյի և գործով ևս չորս ֆիգուրանտների դեմ 450 մլն-ից ավելի ռուբլու չափով վնասը փոխհատուցելու պահանջով: Զագորուլկոն, ինչպես նաև Բուրյակովը գործարք են կնքել քննության հետ:

Աղբյուր` Փաստինֆո