Փաստ ինֆո

Էրեբունի և Նուբարաշեն վարչական շրջանների քննչական բաժնի ավագ քննիչ Միքայել Զադոյանի նկատմամբ ընտրված խափանման միջոց կալանավորումն այսօր ևս չփոփոխվեց:

Երևանի քաղաքի ընդհանուր իրավասության դատարանում  ամբաստանվող քննիչի պաշտպանների կողմից այսօր միջնորդություն ներկայացվեց՝ Զադոյանի նկատմամբ ընտրված խափանման միջոց կալանավորումն անազատության հետ կապ չունեցող՝ չհեռանալու մասին ստորագրությամբ փոխարինելու կամ գրավի կիրառումը թույլատրելի ճանաչելու վերաբերյալ:

Արդարադատության կապիտան Զադոյանն արդեն 8 ամիս է կալանքի տակ է, ըստ պաշտպանի՝ անազատության մեջ հայտնվելով Զադոյանը պատշաճ վարքագիծ կդրսևորի, քննությանը չի խոչընդոտի:

Պաշտպան Ամիրխանյանը միջնորդությունը ներկայացնելիս ակնարկ կատարեց նաև երկրում փոխված քաղաքական իրողության մասին, ապա նաև անդրադարձավ մայիսի 7-ին Անդրիաս Ղուկասյանին կալանքից ազատելու հիմքերին:

Պաշտպան Անանյան էլ նշեց՝ գործով հարցաքննվել են վկաներ, դատարանն անցել է գործի ապացույցների հետազոտմանը և հիմնավոր կասկածն առ այն, որ Զադոյանը կարող է ապօրինի ազդեցություն ունենալ որևէ մեկի վրա՝ բացակայում է: Ինչ վերաբերում է ամբաստանյալ Բաբկեն Գասպարյանի վրա ապօրինի ազդեցություն ունենալուն, ապա «Ներքին դիտում» օպերատիվ-հետախուզական միջոցառման տեսանյութը հետազոտելիս պարզ է դարձել, որ Գասպարյանը համագործակցել է ԱԱԾ-ի հետ՝ նա անօրինական ազդեցության ենթարկվողը չէ:

Պաշտպանական կողմը միացավ միջնորդությանը, իսկ ամբաստանյալ Բաբկեն Գասպարյանը, ով հաղորդում է ներկայացրել, թե կաշառք է տվել Զադոյանին իր որդուն չձերբակալելու համար հայտարարեց՝ «մինչև դատավճիռը բոլորը պետք է ազատության մեջ լինեն, դեռ ոչ մի բան ապացուցված չէ»:

Դատախազ Մնացականյանն էլ առարկեց՝ գտնելով, որ Զադոյանին կալանքի տակ պահելու իրավական և փաստական հիմքերը չեն վերացել ինչպես նաև չի վերացել Զադոյանի կողմից ոչ պատշաճ վարքագիծ դրսևորելու վտանգը:

Դատարանը գտավ, որ Զադոյանի կալանքի տակ մնալու հիմքերը չեն վերացել և միջնորդությունը մերժեց՝ շարունակելով գործով փաստաթղթերի հետազոտումը:

Աղբյուր` Փաստինֆո