Փաստ ինֆո

Շուրջ 15 տարվա վաղեմության՝ Երևանում կատարված սպանության գործով դատական նիստում այսօր ամբաստանյալ Արմեն Ավետիսյանի պաշտպան Էմին Խաչատրյանը միջնորդեց ճանաչել ու հռչակել իր պաշտպանյալի անմեղությունը ՀՀ քրեական օրենսգրքի 104-րդ հոդվածի 1-ին մասով՝ սպանությունը, 235-րդ հոդվածի 1-ին մասով՝ ապօրինի կերպով զենք ձեռք բերելը, պահելը, կրելը առաջադրված մեղադրանքում, և ազատ արձակել նիստերի դահլիճում:

Իր պաշտպանական ճառում պաշտպանը նշեց, որ մեղադրանքը հիմնված է միայն ենթադրությունների վրա: Ավելին՝ մեղադրանքի կողմը ամբաստանյալի մեղքն ապացուցելու բեռը դրել է դատարանի կամ պաշտպանական կողմի վրա:

Էմին Խաչատրյանը նշեց, որ գործով նախաքննությունն անց է կացվել թերի, բազմաթիվ էական խախտումներով: Մասնավորապես, օրենքի խախտմամբ է կազմվել վկային ամբաստանյալին լուսանկարով ճանաչման ներկայացնելու գործողության արձանագրությունը՝ ներկայացված չորս լուսանկարներից մեկը՝ ամբաստանյալինը, գունավոր է եղել:

Գործում բացակայում են նաև իրեղեն ապացույց ճանաչված ավտոմեքենաներն ու ինքնաձիգը:

«Ոչ ինքնաձիգ, ոչ ՎԱԶ 2121 ՆԻՎԱ մակնիշի մեքենա, որի մեջ գտնվել է տուժողը, ոչ 2101 մակնիշի մեքենան, որտեղ, իբր, դատախազության պնդմամբ, հայտնաբերվել է իմ պաշտպանյալին պականող փաստաթուղթ, առհասարակ գոյություն չունի», - «Փաստինֆո»-ի լրագրողի հետ զրույցում ասաց Է.Խաչատրյանը՝ հավելելով, որ երևի շուրջ տասը նիստ հետաձգվել է՝ պարզելու համար, թե ո՞ւմ են ի պահ հանձնված իրեղեն ապացույց մեքենան, որտե՞ղ է ինքնաձիգը:

Ըստ Էմին Խաչատրյանի, իրենք խնդրել են, պահանջել են, որպեսզի իրեղեն ապացույցները բերեն դատարան, որպեսզի իրենք հնարավորություն ունենան հետազոտել, դատողություններ կատարել, նոր միջնորդություններ հարուցել, փորձաքննություն կատարել: Որևէ ապացույց դատարան չի ներկայացվել:

Գործում կա մի հատ անուղղակի ցուցմունք՝ վկա Տիգրան Սիմոնյանի ցուցմունքը, ով ի սկզբանե պնդում է, որ ինքը խնդիրներ ունի ամբաստանյալի ընկերների հետ: Եթե վկան պնդում է, որ մի քանի հոգով՝ բժիշկը, ինքը և հավաքված անձինք, տուժողին հարցնում են՝ ո՞վ է եղել, տուժողն էլ հայտնում է, թե ո՞վ է, ինչո՞ւ մնացած անձինք այդ հանգամանքի մասին չեն հայտնել, հարց տվեց պաշտպանը: «Այսինքն՝ հայտնում է գործի ելքով շահագրգռված վկան, ով 2003թ.-ից, այդ դեպքից հետո Հայաստանում չի գտնվում, չի գտնվել ու ոնց հասկանում եմ, չի էլ գտնվելու»,- ասաց փաստաբանը՝ ցուցմունքը գնահատելով որպես կցկտուր՝ ով ոնց ցանկանա, այնպես էլ կարող է մեկնաբանել:

Պաշտպանը հայտնեց, որ ցուցմունքում իր պաշտպանյալն իրեն մեղավոր չի ճանաչել, ասել է, որ ոչ սպանելու դիտավորություն ու նպատակ է ունեցել, ոչ էլ այդ մարդուն ճանաչել է:

Ի պատասխան մեր հարցի, պաշտպանը հայտնեց, որ դեռ մի քանի օր կա, որպեսզի լրանա վաղեմության ժամկետը: Պաշտպանը նշեց, որ ինքը քիչ ժամանակ է խնդրել ճառին նախապատրաստվելու համար, որպեսզի որևէ մեկի մոտ տպավորություն չստեղծվի, որ պաշտպանական կողմը ցանկանում է, որպեսզի կիրառվի վաղեմության ժամկետ, ընդհակառակը, պաշտպանը միջնորդում է, որպեսզի հռչակվի իր պաշտպանյալի անմեղությունը:

Հաջորդ դատական նիստում պաշտպանական ճառով հանդես կգա ամբաստանյալը:

Նշենք, որ մեղադրողը պնդել է մեղադրանքը ու միջնորդել ամբաստանյալին դատապարտել 12 տարվա ազատազրկման:

Հիշեցնենք, որ ըստ մեղադրանքի, Արմեն Ավետիսյանը 2003թ. հունիսի 7-ին իր կողմից ապօրինի կերպով ձեռք բերված «ԱԿ 74» տեսակի հրազենով Երևանի Եզ. Կողբացի փողոցի 56-րդ շենքի մոտ, սպանելու դիտավորությամբ կրակահերթ է բացել նույն փողոցով ընթացող «Վազ 2121» մակնիշի ավտոմեքենայի վարորդ Արթուր Մկրտչյանի վրա, որի հետևանքով վերջինս ստացել է մարմնական վնասվածքներ և հաջորդ օրը հիվանդանոցում մահացել է:

Աղբյուր` Փաստինֆո