Փաստ ինֆո

Ազգային ժողովի պետական-իրավական հարցերի մշտական հանձնաժողովի դրական եզրակացությամբ Խորհրդարանն առաջին ընթերցմամբ ընդունել է «Դատախազության մասին» ԱՀ օրենքը:

«Արցախպրես»-ի թղթակցի հաղորդմամբ՝ «Դատախազության մասին» որոշման նախագիծն ԱԺ լիագումար նիստին ներկայացրել է ԱՀ արդարադատության նախարար Արարատ Դանիելյանը՝ մանրամասնելով, որ նախագծի ընդունումը պայմանավորված է գործող օրենքը 2017 թվականի փետրվարի 20-ին ընդունված Սահմանադրությանը համապատասխանեցնելու, դատախազության գործունեության մի շարք ուղղությունների նորովի կարգավորումներ սահմանելու, օրենքում առկա բացերը և անճշտությունները վերացնելու անհրաժեշտությամբ:
 
Այսպես՝ ԱՀ Սահմանադրության 146-րդ հոդվածի 2-րդ և 3-րդ մասերով սահմանվել են դատախազության լիազորությունները, որոնք իրենց արտացոլումն են գտել նախագծի 5-րդ գլխում: Սահմանադրության 146-րդ հոդվածի 2-րդ մասի 3-րդ կետի համաձայն՝ դատախազությունը հսկողություն է իրականացնում մինչդատական քրեական վարույթով իրականության նկատմամբ: Նշված լիազորության իրականացման կարգը սահմանվում է օրենքի 23-րդ հոդվածով և ԼՂՀ քրեական դատավարության օրենսգրքով: Սահմանադրության 146-րդ հոդվածի 3-րդ մասի համաձայն՝ դատախազությունն օրենքով սահմանված բացառիկ դեպքերում և կարգով պետական շահերի պաշտպանության հայց է հարուցում դատարան:
 
«Հաշվի առնելով վերոբերյալը՝ նախագծով ամրագրվել է, որ պետական շահերի պաշտպանության հայց հարուցելը իր մեջ ներառում է նաև պետության պատվիրարկված լիազորությունների իրականացման համար պետության կողմից համայնքին ուղղված ֆինանսական միջոցների հետ կապված շահերի պաշտպանության հայց հարուցելը:
 
Նոր օրենքով ընդլայնվել են դատախազի լիազորությունները՝ բացառիկ դեպքերում՝ պետական շահերի պաշտպանության հայց հարուցելիս: Մասնավորապես՝ դատախազն իրավունք ունի անվճար օգտվել ծառայողական նպատակներով օգտագործվող տեղեկատվական տվյալների  բազայից, ինչպես նաև պետական բյուջեով նախատեսված միջոցների հաշվին՝ անհրաժեշտության դեպքում ներգրավելով համապատասխան մասնագետի կամ փորձագետի: Սահմանվում է, որ համապատասխան մարմինները պարտավոր են դատախազին տրամադրել պահանջվող իրավական ակտերը, փաստաթղթերը և այլ տեղեկությունները ողջամիտ ժամկետում: Հստակեցվել է նաև դատախազության իրավասությունը պետական շահերի պաշտպանության լիազորություններն իրականացնելիս»,- նշել է Ա. Դանիելյանը:
 
Նախարարի խոսքով՝ Սահմանադրության 147-րդ հոդվածի 2-րդ մասի համաձայն՝ գլխավոր դատախազ կարող է ընտրվել 35 տարին լրացած ԱՀ քաղաքացի հանդիսացող, ընտրական իրավունք ունեցող, բարձր մասնագիտական որակներով և մասնագիտական աշխատանքի առնվազն 10 տարվա վարձատրության փորձառությամբ բարձրագույն կրթությամբ իրավաբանը: Նոր օրենքով առաջարկվում է նաև որոշակի խմբագրական փոփոխություններ կատարել թվով 6 հոդվածներում, որտեղ ներկայացված օրինագծով կետերը համապատասխանեցնել Սահմանադրության ամրագրված խմբագրությանը:
 

Աղբյուր` Փաստինֆո