Փաստ ինֆո

«Փաստինֆո»-ի տեղեկություններով, Մասիսի քաղաքապետի ինչպես նաև քաղաքապետի տեղակալի և մյուսների վերաբերյալ զանգվածային անկարգությունների գործը Գլխավոր դատախազությունը Քննչական կոմիտեից պահանջել է՝ ձերբակալությունների իրավաչափությունը ստուգելու նպատակով: Մեր այս տեղեկությունը հաստատեցին նաև Քննչական կոմիտեից:

Այսօր հայտնի դարձավ, որ այդ գործի շրջանակներում 5 անձի այդ թվում նաև Մասիսի քաղաքապետին մեղադրանք է առաջադրվել:

Հայտնի է նաև, որ արդեն մեղադրյալների փաստաբանները բողոքարկել են ինչպես իրենց պաշտպանյալների ձերբակալման՝ այնպես էլ կալանավորման վերաբերյալ որոշումները և ներկայումս այդ որոշումները դատարանում քննության է առնվում:
Մասիսի քաղաքապետ Դավիթ Համբարձումյանին մեղադրանք է առաջադրվել ինչպես անկարգությունները կազմակերպելու，այնպես էլ մասնակցելու համար՝ ՀՀ քրեական օրենսգրքի 225-րդ հոդվածի 1-ին եւ 2-րդ մասերով։ Նախօրեին ձերբակալված մյուս 4 անձանց մեղադրանք է առաջադրվել զանգվածային անկարգություններին մասնակցելու համար՝ ՀՀ քրեական օրենսգրքի 225-րդ հոդվածի 2-րդ մասի հատկանիշներով:

Այսպիսով, մեղադրանքներ են առաջադրվել Մասիսի քաղաքապետ Դավիթ Համբարձումյանին, քաղաքապետի տեղակալ Կարեն Օհանյանին, Մասիս քաղաքի բնակիչներ՝ 1982թ. ծնված Ս.Սահակյանին, 1995 թ. ծնված Գ.Համբարձումյանին և 1988 թ. ծնված Գ.Խաչատրյանին:

Նրանց նկատմամբ որպես խափանման միջոց կալանավորումն ընտրելու վերաբերյալ միջնորդություն է ներկայացվել դատարան։

Ստացվում է， որ քաղաքապետի ձերբակալության հիմքերը դատարանում քննարկվելուն զուգահեռ ուսումնասիրելու է նաեւ դատախազությունը։

Աղբյուր` Փաստինֆո